2y6m
行程：Black Tap－朱美拉露天市場 Souk Madinat Jumeirah－運河遊船 Abra Tour－朱美拉公眾海灘 Jumeirah Public Beach－Al Safadi Restaurant－Fraser Suites Hotel
第二日等星爸瞓醒已經十點幾喇，即刻出發去朱美拉古城運河酒店渡假村食 lunch
朱美拉古城運河酒店渡假村 Madinat Jumeirah 係同帆船酒店同一個集團
呢個渡假村有四間酒店，以傳統杜拜建築同運河水道，重現昔日杜拜灣嘅古城風貌
入面有市集、劇場、水上樂園同沙灘，仲可以免費搭 Abra 遊運河，係酒店玩足幾日都得！
我地泊好架車係 Jumeirah Al Naseem，經過九曲十三彎，終於黎到海龜保育池
好多唔同風味嘅餐廳係海龜池附近，酒店房就係正上面
如果每朝一起身都可以望到咁迷人嘅風景真係精神呀！
真係會見到海龜架！有成十幾隻海龜係度游水曬太陽
酒店每年都會拯救受咗傷嘅海龜，擺佢地黎呢度治療同保育，等佢地好返就會放返杜拜灣
同星星睇完海龜就去 Black Tap 食 lunch
媽咪之前係網上見到 Black Tap 嘅 crazy shake 就已經覺得好吸引
即刻叫咗杯 Cotton Candy Strawberry Shake，好靚好靚好靚不過亦都好甜好甜好甜
星爸同星星就食 burger 同 fish and chips，不過不失啦
－
Black Tap
地址：906 Jumeira Road, Umm Suqeim 3, Dubai, U.A.E
電話：+971 4 422 9904
食飽就去附近嘅朱美拉露天市場 Souk Madinat Jumeirah 行古城
呢度嘅設計係仿照傳統露天市集，建築一啲都唔馬虎，每個角落都充滿阿拉伯味道
古城嘅裡裡外外都有好多小商店，賣手信紀念品、畫像、手工地毯、傳統服飾等等
中間有個露天廣場，行到攰可以係 coffee shop 休息吓
星星好難得地趁我地行街瞓晏覺，等媽咪可以慢慢四圍行
經過間傳統服飾舖頭，見到有件長袍 kandoura 連埋頭巾好岩星星著
忍唔住買咗套俾佢，俾錢時又忍唔住幫星爸買，星爸又慫恿媽咪一齊買
於是我地一家三口每人都買咗套，準備聽日去謝赫扎耶德大清真寺大派用場
呢度買野一啲都唔平，講咗價都要五百幾港紙一套 💸
等星星瞓醒我地就去搭 abra ride，係古城入面嘅 Souk Abra Station 買飛
由於我地唔係呢個渡假村嘅住客，所以成人要俾 85 AED，小童要 50 AED
買好飛後要等二十分鐘先有船，碼頭嘅風景好迷人
雖然係二月，但杜拜中午都有成三十度，好猛太陽 ☀️好彩唔似香港熱得黎咁黐立立
話咁快等到我地上船喇
渡假村由呢條人工運河貫通幾間朱美拉酒店、餐廳同購物中心，沿途見到嘅建築物都係酒店客房
去到運河盡頭終於見到鼎鼎大名嘅帆船酒店喇～～～船家停定隻船俾我地慢慢影相
成個船程大概二十分鐘，欣賞完帆船酒店就沿路折返，係返 Souk Abra Station 落船
－
Abra Tour
營業時間：10am - 11pm（冬季）11am - 11pm（夏季）
電話：+971 4 366 8888
星星瞓醒晏覺好好精力，我地就帶佢去附近嘅朱美拉公眾海灘 Jumeirah Public Beach 玩水
如果想一邊玩水一邊欣賞帆船酒店，最近嘅就係呢個公眾海灘
因為附近嘅沙灘都係 private，要酒店住客先可以入去
星星好鐘意去沙灘玩，係小賣部買咗啲沙灘玩具俾佢砌城堡
玩咗個幾鐘，雖然媽咪係咁幫星星補搽太陽油，但都見到佢明顯曬黑咗好多 👦🏿
玩完去 Al Safadi Restaurant 食黎巴嫩菜晚餐，黎杜拜食嘅第一餐中東菜
餐廳門口有位泊車，見仲未天黑又開始涼涼地，我地就坐戶外
一坐低就有幾款前菜漬物，好酸嘅黃瓜同好酸嘅豆同好酸嘅豆同好酸嘅豆
媽咪麻麻地鐘意食豆，所以試咗一粒之後都冇掂過 😅
仲有 free refill 嘅薄餅，雖然好淡口，但星星玩完水超肚餓，大啖大啖食咗幾塊
上網睇 Grilled Chicken Wings 係呢度嘅招牌菜，真係冇介紹錯 👍🏻
雞翼皮烤到好脆，一咬落去啲汁咇哂出黎，而且雞肉好嫩滑
雞翼用咗檸檬、蒜頭、辣椒同其他香料去醃，配埋白色個 yogurt 醬食好有中東風味
一碟得六隻真係唔夠食，媽咪一個人都可以啪哂成碟
我地仲叫咗 Hummus with Meat Shawarma（右上）同 Grilled Chicken Kafta（右下）
牛肉 Shawarma 麻麻地，有啲 “鞋” 口，而且都幾重口味
反而媽咪鐘意雞串燒，將醃過嘅雞肉同蔬菜搞碎再拎去烤，唔油膩仲好入味
－
Al Safadi Restaurant
地址：19 3 St, Umm Al Sheif, Dubai, U.A.E
電話：+971 4 333 6665
2y6m
行程：哈里發塔 Burj Khalifa (At.mosphere)－杜拜購物中心 Dubai Mall－杜拜水族館 Dubai Aquarium & Underwater Zoo－Texas Roadhouse－杜拜音樂噴泉 Dubai Fountain－Fraser Suites Hotel
等到頸都長終於有得新年去旅行喇，今次去遠少少出發中東，離開香港避寒
仲有得坐 Emirates 嘅 A380，一家大細三個人機票夾埋＄14xxx
香港飛杜拜要八個鐘，星星第一次坐咁耐飛機，好彩係凌晨機
星星係飛機未起飛前已經瞓咗，瞓到臨降落前十五分鐘先起身，實在太好喇！
飛到杜拜係當地時間 5am，星爸同媽咪都瞓得麻麻地，反而最精神嘅係星星
一落機去租車公司拎車，跟住就出發去哈里發塔嘅 At.mosphere 食早餐
去旅行前做咗少少 research，去 At the Top 哈里發塔（124＆125 層）要 135 AED 一個人
但去 At.mosphere（122 層）食早餐 min spend 都只係 200 AED 一個人，星星未夠五歲唔計
而且 At.mosphere 淨係得早餐時間可以招待未夠十歲嘅小朋友，計落好似去食早餐抵啲！
我地係哈里發塔隔黎嘅 Armani Hotel 入去
搭 lift 直上去到 123 層，再行返一層落 At.mosphere
Book 咗 8am，可能時間仲早，餐廳入面都係得幾枱客人
Book 枱時 request 咗要窗口位，雖然媽咪仲好眼瞓，但望住杜拜朝早嘅景色食早餐即刻精神哂
媽咪叫咗個 Full ATM Breakfast，星爸就食 Lobster Scrambled Eggs，超超超超超好味 😋
星星食小朋友嘅 mini breakfast Brioche French Toast，都唔錯呀！
－
At.mosphere Restaurant
地址：122nd Floor, Burj Khalifa, Downtown Dubai, U.A.E
電話：+971 4 888 3828
慢慢嘆食咗兩個鐘就出發去哈里發塔隔黎嘅 Dubai Mall
呢個 shopping mall 好巴閉，係全球最大型嘅購物中心，連出面嘅音樂噴泉亦都係最球最大
入面有超過 1200 間舖頭，真係咩牌子都有，而且仲有水族館、溜冰場、鬼屋等等
同星星去旅行一定要去水族館啦，泊好架車係 Cinema Parking P7，就搭 lift 去 2/F
（千奇唔好求其泊，因為 Dubai Mall 有 50 個標準足球場咁大，泊錯咗停車場就有排行喇！）
我地去到水族館入口買飛，售票處隔黎就有一個極大嘅魚缸，好吸睛！
一入水族館會經過條海底隧道
星星靜靜欣賞啲魚係佢頭頂同身邊慢慢游過，好似置身係海底世界咁
出咗隧道，搭電梯去到水族館嘅內部，一個好似實驗室嘅地方
呢度可以玩 Shark Dives 同坐玻璃底遊覽船（當然要買 ticket 啦）
另外亦都有講解員免費即場示範餵小鯊魚，大概睇咗五至十分鐘，匆匆忙忙地餵完，冇乜驚喜
行完水族館我地就黎到 Underwater Zoo，入面有其他海洋動物
媽咪最鐘意 jellyfish，次次去親水族館都一定會影吓佢地 ❤️
另外仲有啲大型少少嘅動物，好似水獺、企鵝、鸚鵡、鱷魚等等
有條樹屋吊橋好得意，可以係動物園上面穿梭
星星初頭行上去都有啲驚，但好快就好鐘意係上面跑黎跑去
－
Dubai Aquarium & Underwater Zoo
地址：Ground & Level 2, The Dubai Mall, Dubai, U.A.E
開放時間：10am - 12am，最遲入場 11:30pm
玩完水族館就係 Dubai Mall 食埋晚餐先，我地去 Texas Roadhouse 食西餐
杜拜嘅夜晚唔太熱，所以揀咗坐係室外，仲可以睇到少少杜拜音樂噴泉
每張枱都有一大桶 free refill 花生，我地嗌咗牛扒、烤三文魚同 mini cheese burger
點知…中伏了！真心覺得難食，樣樣都好鞋冇肉汁，特別係星星個 burger，佢食咗幾啖就停口
其實餐廳嘅四周都好舒服，有燈飾有夜景又有音樂聽，如果呢餐唔係咁難食就 perfect 喇！
我地嗱嗱聲食飽就係附近行吓，係音樂噴泉前面有呢個打卡熱點 I ❤️DUBAI
夜晚嘅哈里發塔，真係好好好好高呀，如果宜家先上去睇夜景一定一流呀！
周圍行咗陣終於等到有得睇音樂噴泉喇 ⛲️
每條色彩鮮艷嘅發光水柱隨住音樂而擺動，難怪會成為杜拜最著名嘅表演
杜拜音樂噴泉嘅噴泉編排系統係全球最大，每晚由 6pm - 12am 每隔三十分鐘就有一場表演
如果想近距離睇清楚啲可以上 At the Top 官網買飛（20 AED）
睇完表演星星都開始冇電喇，出發返酒店
係 Hotels.com book Fraser Suites Hotel 呢間酒店，平均＄1400 一晚
我地訂咗 Deluxe Apartment，1 房 1 廳仲有埋廚房同洗衣機
岩哂早起嘅星星起身唔會嘈醒訓到黃朝百晏嘅星爸，又岩哂好鐘意邊去旅行邊洗衫嘅媽咪 😙
2y6m
星星由細到大都有睇書嘅習慣，平時朝早會睇兩本書，臨瞓前又會睇一本
而 What The Ladybird Heard 係佢其中一本好鐘意睇嘅書
媽咪同星星已經睇咗幾十次，真係百看不厭 🤦🏻♀️
見到 kidsfest! 今年又開舞台劇，星星睇過其中四本書
媽咪就揀咗星星最鐘意睇嘅 What The Ladybird Heard
星星知道後好開心，仲帶埋自己本故事書一齊去朝聖
媽咪幫星星打扮吓，星星個樣即刻大個咗好多 😍仲好成熟添呀！
What The Ladybird Heard 由開場到完場都做得好精彩，一啲悶場都冇
而且中間有幾首歌好好聽，加埋現場嘅音樂，星星睇得好投入，仲會自己打拍子搖吓個身
尤其做到最尾警察叔叔黎捉走兩個小偷果陣，星星最肉緊，忍唔住大叫「好耶捉到曳曳喇」
入場前近門口有賣 Julia Donaldson 嘅其他書同精品
星星亦都好鐘意佢嘅 collection，媽咪係 Book Depository 買咗好多本
係呢個網買書真係好平，仲要 free delivery
平時去書局睇岩啲故事書，媽咪都會記低書名，再去呢個網搵，通常都比書局買平 👍🏻
－
What The Ladybird Heard
節目地點：香港演藝學院賽馬會演藝劇院
節目日期：2018 年 2 月 8 至 11 日
節目長度：一小時
2y6m
星期六 family day 又同星星去行山喇，今次揀咗條超易行嘅大帽山家樂徑
我地渣車去到郊野公園附近泊低，行咗一段斜路就見到大帽山郊野公園喇
今日好凍好凍，星星好似仲係一舊雲咁未瞓醒
行過小賣部會見到大帽山家樂徑嘅牌
沿住石級一路行，星星好鐘意執地下嘅樹枝周圍挖
人仔細細已經知道啲蛇會匿係樹葉同樹窿果度
行咗冇幾耐就見到有條溪澗，星星見到雙眼發光 🤩
即刻拖住星爸去 dump 石頭，星星仲話啲石頭好似 poo poo咁，吹…漲 😂
玩咗一輪又繼續行，黎到扶輪公園嘅燒烤場
見到扶輪公園自然教育徑就差唔多行完喇，今次真係好快就行完
我地仲見到有人燒野食好香呀，星爸話下次行山一定要燒野食 🤤
星星都一齊食餅充肌，今次行咗大半個鐘都唔洗抱（因為真係好短程…）
下次等天氣冇咁凍可以挑戰吓行耐少少喇！
－
大帽山家樂徑
交通：港鐵荃灣站搭 51 號九巴到荃錦坳郊野公園站
長度：約 0.5 公里
需時：一小時（連影相）
2y5m
Last visit on 2017.12.25
媽咪又趁星爸未起身同星星黎大棠玩喇
住係元朗嘅 Top 1 好處，總有一個農莊係附近 😂
星星由細細個開始已經成日黎，好熟農莊啲地方
去完馬房就去遊樂場，再去餵羊咩咩
羊咩咩 bb 放咗出黎周圍走，星星今次冇再驚喇，好專心餵佢地
臨走前咁岩見到有孔雀開屏，白色好靚呀 😍
媽咪見時間仲早，星星仲未開始好眼瞓，就去埋冰雪嘉年華先
同星星第一次踩家庭單車，星星好興奮，係咁揸住軚盤扮揸車
仲要特登踩上斜路 sir 落黎，於是媽咪載住星星踩…咗…好…耐…好…耐 😪
等星星大個仔要載返媽咪呀！（應該冇咩可能仲會 show 媽咪…）
－
大棠有機生態園
地址：元朗大棠山道十一號
開放時間：9am - 6pm
