圓方天台兒童遊樂場 - Elements

2y2m

今日要去買生日禮物送俾星星爺爺，去 Elements 行街順便帶星星去呢個遊樂場玩

係 ThreeSixty 對出搭 lift 去到 PR 層，行過一條小路就見到喇

個遊樂場好大同好多野玩，有搖搖車、企係度玩嘅搖搖板、平衡木同幾條滑梯

仲分好哂一個個 area 俾唔同年紀嘅小朋友玩

其中有個氹氹轉最吸引到星星，雖然佢隻腳唔夠長踩唔到，好在有個哥哥幫手搏命踩

搭吓順風車都好滿足 😊

呢度靜靜地唔太多人，下次黎開 Elements 都要再黎玩呀！

T · PARK [源· 區] - 屯門稔灣

2y2m

Book 咗幾次黎 T · PARK 都出咗啲意外黎唔到，今日終於成功去到喇

今次淨係報名 join 咗個導賞團，呢度仲有個 spa 可以浸吓，但星星有濕疹就唔放心俾佢浸

去到 T · PARK 聞到有少少嘅垃圾臭味，入咗室內就冇味，俾我想像中好

睇咗一段片講關於呢個 T · PARK 嘅由來同威水野

媽咪一路睇一路擔心星星會唔會睇得明 （兩歲小朋友連污泥係咩都唔知...又點會明丫）😓

好在星星都肯坐定定睇哂成個 video

之後導賞員就帶我地出發去參觀唔同嘅展覽區，俾我地了解 T · PARK 點樣處理污泥同運作

星星行咗十分鐘，終於忍唔住開 turbo 周圍跑，媽咪唯有帶佢去 cafe 度食少少野

Cafe 嘅所有枱凳都係用舊灣仔碼頭嘅防撞木所製成，好有特色，星爸見到一定好鐘意

嗌咗個磨菇意粉同星星 share，自己係雪櫃拎再叮返熱，都幾好味

係呢度食完要自己洗返乾淨啲食具，非常環保

望住出面嘅大海食野好舒服，但湊住呢隻百厭星都 relax 唔到

帶佢去二樓嘅戶外花園影吓相，俾佢跑吓放吓電

男仔真係冇時停，一見到地方大少少就會不停跑（究竟你係咪倉鼠...）

岩岩好睇埋日落，可惜媽咪部相機冇哂電，冇得幫星星影多啲靚相

－

T · PARK [源· 區]

地址：屯門曾咀稔灣路 25 號

開放時間：星期一、星期三至日 10am - 7pm

交通：有穿梭巴士係港鐵屯門站公共運輸交匯處（V City 地下嘅旅遊巴士停車處）

＊預約時要 book 埋穿梭巴士嘅上落車時間，自己渣車去都要 book 埋停車場泊車位

＊如果小朋友太細唔建議 book 導賞團，淨係係出面戶外影相嘅話只要網上 book 交通就得

南昌公園 - 南昌

2y2m

等星星放學後一齊去奧海城行街，點知佢無啦啦話想搭 train

於是我地係奧運搭一個站去南昌，同佢去南昌公園放吓電啦（媽咪冇得行街喇 😭）

係西鐵南昌站 D1 出口出，過條馬路就到，好方便！

南昌公園最大特色，就係有個二萬平方米嘅草坪，放假時好多人都會去野餐

星星去到遊樂場就衝去玩 sir 滑梯 ☀️好快就大汗揼細汗

玩完遊樂場去隔黎斜坡草地爬上爬落，仲有個窿窿可以捐黎捐去

之後星星帶媽咪去草地執樹枝石頭，玩到成個頭濕哂

小朋友總係有無窮嘅體力，好在公園唔多人，一有大空地星星就會周圍跑，媽咪追到冇氣 😵

－

南昌公園

地址：九龍深旺道 20 號（西鐵南昌站 D1 出口）

老鼠洲兒童遊樂場 - 屯門

2y2m

老鼠洲兒童遊樂場位於屯門青山灣老鼠洲

2004 正式啟用，以舊車胎同塑膠廢料建成，係香港第一個環保公園

遊樂場嘅主題係海盜船，中間有一艘最 signature 嘅巨型中式帆船

四周都係帆船設計，有甲板、指南針、燈塔、獨木橋同吊鐘等等

星星圍住隻船係咁跑，仲識到個哥哥肯同星星一齊玩，媽咪可以唔洗追住星星，太好喇！

跑咗二十分鐘成頭大汗都仲咁好精力，媽咪真係佩服你 😆

星星好鐘意爬上去，初頭媽咪都好驚佢叉錯腳跌落黎，爬多幾次見佢都好小心都放心小小

咁鐘意爬高遲啲可以參加攀石班 😂

－

老鼠洲兒童遊樂場

地址：屯門青山灣老鼠洲（輕鐵三聖站）

【塞班島 7 天親子自駕遊】美國紀念公園｜萬歲崖 - Day 2

2y

行程：iHop－美國紀念公園 American Memorial Park－萬歲崖 Banzai Cliff－Himawari－Airbnb 度假屋

我地間度假屋有兩層層間房兩個廁所，岩岩好夠我地八個人住

星星第一次同其他人同一屋簷下，媽咪初頭都驚星星太早起身嘈醒其他人

但由於尋晚太夜先瞓，星星都瞓到十一點幾先起身（平時佢七點幾就起身）

媽咪一腳踢幫星星沖奶、換片、換衫、刷牙、洗奶樽、執行李

到所有人都起哂身我地就出發去 iHop 食飯

之前係美國讀書果陣都有去過 iHop，最出名係 pancake 同 Hash browns

但印象中好似都係美國嘅 iHop 好味啲 🤔

食飽後就出發去塞班島嘅第一個景點喇～美國紀念公園 American Memorial Park

一個為咗紀念係第二次世界大戰中犧牲嘅塞班島軍人而建嘅公園

呢個公園超級大，除咗有網球場、野餐區同大草地之外，仲有一個紀念二次世界大戰嘅博物館

收藏咗軍隊嘅武器、軍服同相片等等，我地都有入去行咗個圈（免費入場）

星星好明顯就冇乜興趣，媽咪寄完 postcard 後就同星星出出面草地玩吓

塞班島真係太好陽光，係戶外一陣已經熱到頂唔順，星星都跑到紅都面哂

－

美國紀念公園 American Memorial Park

地址：Beach Road Saipan, MP 96950

第二個景點 Banzai Cliff 萬歲崖（自殺崖）背後嘅歷史故事好悲慘

當時日軍同美軍打仗，最後日軍剩返千幾人留守，佢地唔想做美軍嘅俘虜

於是帶同家屬一齊去塞班島最北嘅地方－萬歲崖－跳崖自殺 ☹️

萬歲崖周圍嘅風景好靚，塞班島嘅天空特別藍，望住一望無際嘅大海，真係好舒服

有架小賣車係景點附近，星星第一次試食雪條，tangerine 味好特別，不過星星唔多鐘意食

夜晚去 Himawari 食飯，係好美式嘅日式餐廳，我地全部人都好肚餓，不停嗌咗好多 sushi

媽咪讀書時好鐘意食 Dragon Roll，黎到依度有得食番喇

壽司飯包住炸蝦天婦羅，有牛油果同蟹子係上面 ，好掛住呢隻卷呀！

星星食果個雞肉烏冬都好好味 👍🏻

Himawari 隔黎有個日式超市，食飽去果度買埋乾糧同水，仲有格仔餅雪糕添！

－

Himawari

地址：Bukiki Ave., Garapan, Mariana Islands

營業時間：11:30am - 2pm；5pm - 9:30pm

香港動植物公園｜山頂凌霄閣

23m12d

同星星第一次去香港動植物公園，星星呢排好鐘意 🐒，諗住帶佢親身見吓

我地係花園道入口入，媽咪有帶埋 bb 車去，見到咁多樓梯，早知唔帶啦！

一路向上行，見到有好多唔同種類嘅雀仔，又有個兒童遊樂場，同星星係度放陣電先

玩咗陣已經出哂汗，再行上啲去教育及展覽中心涼陣冷氣 🌬

入面有好多動物嘅模型，星星最鐘意係隻豹，眼定定望咗好耐

側邊有個 area 可以俾小朋友睇書同玩玩具，太好喇，媽咪可以同星星休息吓

休息完就出發睇猴子喇，星星見到有咁多猴子好興奮，仲執起地下啲果實諗住俾猴子食 😆

睇完猴子可以經過時光隧道去返山下面

我地沿途慢慢行，好快就去返起點度，媽咪見時間仲早，就決定同星星去轉山頂！

－

香港動植物公園

地址：香港中環雅賓利道

行去山頂纜車總站有段距離，去到仲排咗半個鐘隊

媽咪同星星都係第一次搭纜車 😆媽咪超耐都冇上過山頂喇，唔知有咩睇呢

搭纜車時開始落雨，星星又有少少攰，好彩佢都乖乖坐好冇發脾氣

啲雨越落越大，我地入咗凌霄閣避雨，誤打誤撞入咗「搞錯 3D 藝趣坊」

免費入場，入面有好多 3D 場景可以影相，媽咪都同星星影咗一張做紀念

出返黎見到仲落緊雨，星星又瞓著咗，唯有等下次先去埋凌霄閣摩天台 428 啦！

－

搞錯 3D 藝趣坊

地點：山頂凌霄閣一樓

香港濕地公園 - 天水圍

22m27d

之前買咗 annual pass 好耐都冇再去，見今日好好天就帶星星去玩

去到門口見到好多鴨仔同雀仔，星星睇得好開心，仲一支箭咁衝入去

星星好鐘意麥兜，睇個短劇場睇到入哂神

佢仲好鐘意禁啲沼澤嘅動物聲，呢個高度岩哂佢玩

黎到濕地公園一定要去呢個 playhouse 玩

雖然岩佢呢個歲數玩嘅野唔多，得一條滑梯，但星星次次都好鐘意玩

係呢度玩咗大半個鐘先捨得走

準備走果時無啦啦落大雨，好彩岩岩有架的士泊咗係度，如果唔係要行去搭輕鐵真係超呢 hea

－

濕地公園

地址：天水圍濕地公園路（天水圍西鐵站轉 705／706 輕鐵，濕地公園站）

開放時間：10am - 5pm（逢星期二休息）

D • Park - 荃灣

22m24d

朝早又落大雨，係屋企油顏色玩吓沙等雨停

媽咪畫咗星星最鐘意嘅巴斯同豬豬，又搵咗個盒俾佢玩沙

Kinetic sand 真係好好，唔怕整到周圍都係沙，好易清潔

等雨停咗之後我地就去 D • Park，帶星星去鯨魚花園玩，佢遠遠見到就好興奮嗌「Giraffe」

玩果時有哥哥同星星爭玩，媽咪教星星要叫哥哥排隊

佢即刻大叫「排隊」，嚇到其他小朋友都望住佢，星星你下次可唔可以溫柔啲呀？😅

係 Shoopen 買咗個背囊俾星星，dinosaur 公仔佢好鐘意，即刻要咩住行街

星星呢排都開始多咗自己行，希望遲啲可以唔洗帶 bb 車出街啦

Miffy 之拯救海洋｜中間道遊樂場 - 尖沙咀

22m22d

科學館逢星期三免費入場，宜家又有 Miffy 展覽，好岩小朋友去玩

我地大概 12pm 去到，唔洗排隊就有得入場

最底果層有巨型祿豐龍化石，恐龍迷星星企定定好認真咁觀察咗好耐

而另一邊有好多非洲草原嘅動物，星星以為佢地係真，係咁同佢地 say hello

一樓有個展覽廳關於職業安全健康，星星入到去見到啲假嘅地盤工人話「驚驚」😂

媽咪望下佢地個樣又幾恐怖喎，記得細個去科學館都見過果個博士，個樣十幾年不變

三樓兒童天地最岩星星，睇完 Miffy 再玩「圓球滾滾溜」玩到唔捨得走

我地係科學館大概玩咗兩個鐘，離開果陣已經見到出面要排長龍先入到

－

Miffy 之拯救海洋

地址：尖沙咀東學館道二號香港科學館三樓展覽廳

展覽日期：2017 年 4 月 7 日至 2017 年 10 月 11 日

見時間仲早，就順路去埋中間道遊樂場

係漆咸道南、梳士巴利道交界嘅港鐵尖東站平台上面（由科學館慢慢行過去大概十分鐘）

途中聽到有直升機飛過，星星勁興奮話俾媽咪知有飛機係上面

去到公園見到有個哥哥玩緊，佢即刻走埋去捉住人

兩個跑黎跑去，媽咪都冇哂氣追，由哥哥同佢好好放電