東華三院飄雪夢幻天秀墟 - 天水圍

2y5m

天秀墟係今個聖誕將會佈置成充滿歐陸色彩嘅冬日小鎮

仲可以係漫天飄雪下欣賞冬日 3D 光影匯演，係小鎮大街營造冬日聖誕嘉年華會嘅氣氛

一入場星星就要同熊啤啤同薑餅人影相，繼續擺返佢個招牌 pose

係天秀墟正門入口嘅左手邊有「歡樂蹦蹦跳遊樂區」，星星見到即刻拉住媽咪要排隊玩

呢兩個充氣城堡彈床適合 90 - 140cm 嘅小朋友玩，每節遊戲時間五分鐘，最重要係免費架！

所以好多人排隊，我地岩岩排到第一輪，唔洗等好耐就有得玩喇

媽咪係滑梯出口等咗星星好耐都唔見人，裝吓佢原來係度開 turbo 不斷跳高，玩得好開心 😆

墟市入面有好多小檔攤，有舊式士多、玩具店、雜貨舖、懷舊理髮店等等

星星徘徊係玩具店前好耐，見到佢雙眼發光都有啲心郁，好在最後媽咪都成功企硬冇買玩具

睇完玩具去隔黎嘅美食攤位依肚，星星有得飲最鐘意嘅熱維他奶，又同媽咪 share 燒賣食

「光影匯影大街」啲佈置都幾靚，充滿歐陸色彩氣氛，陣間就有得係呢度睇 3D 匯演

「異・同鏡像館」係一間由好多巨型鏡同燈飾組合而成嘅鏡屋

係好多顏色嘅燈泡下，透過好多塊鏡嘅反射，令人好似置身係奇幻世界咁 

星星著咗對 Skechers 閃燈鞋，同上面燈泡嘅顏色好夾呀，媽咪仲捕捉到星星跳起嘅一刻

差唔多到六點我地就行去「光影匯影大街」等睇落雪

經過舊式士多，搵到媽咪細個好鐘意玩嘅彈彈機，星星彈彈吓彈中咗樣小禮物

仲有以前踩單車成日食嘅冰菠蘿 🍍星星第一次食，係咁嗌好凍但又停唔到口 🤣

終於到六點有得睇「冬日飄雪 3D 光影匯演」

每晚由六點開始，每個鐘都會播放以啤啤熊奇幻歷險為主題嘅匯演

光影匯演投射係大型銀幕上面，配合燈光同音樂，加埋最後嘅飄雪，充滿聖誕氣氛！

星星睇到眼定定，到後尾飄雪果時係咁拍啲雪，最後成頭成手都係泡泡

一場光影匯演大概十分鐘，完場後要小心啲慢慢行，地下全部係泡泡好易滑倒！

－

東華三院飄雪夢幻天秀墟

地點：天水圍天秀路18號東華三院天秀墟（天水圍西鐵站轉乘 705 輕鐵，係天秀站落車）

開放日期：2017 年 12 月 15 日至 2018 年 1 月 3 日

開放時間：4pm 後

白雪天地｜隱藏光影國度 - D2 Place

2y4m

終於有時間帶星星黎 D2 Place 打卡影相喇

媽咪好想去睇隱藏光影國度同去白雪天地同星星影相好耐喇！

我地首先去咗二期地下睇深入地底嘅 The Undiscovered World

岩岩好唔洗排隊就開始播，平日下晝仲好少人添，媽咪同星星一齊坐地下靜靜欣賞

唔知星星睇唔睇得明，但佢一見到地球同宇宙就話「巴斯屋企」😂

－

隱藏光影國度 The Undiscovered World

地址：D2 Place 二期 The Garage 地下

開放日期：2017 年 11 月 23 日至 2018 年 1 月 1 日（逢星期二暫停開放，12 月 26 日除外）

開放時間：12pm - 9pm（每節十分鐘）

－

睇完投射表演去商場上面行個圈，見到 BABiBOO x 西班牙 Goula 有聖誕 workshop

＄30 可以 DIY 木製 postcard 仲會幫你寄埋添，星星都寄咗俾星爸，唔知聖誕前收唔收到呢 🎄

行過一個街口去 D2 Place One 嘅白雪天地影冰屋

搭𨋢上到頂樓再行多一層樓梯就到喇，好在今日去都唔係好多人～

星星最鐘意嘅 igloo，一見到即刻走上去擺 pose 影相，又係佢個 signature Iron Man pose 😂

星星仲係咁問媽咪啲雪係邊，好似見到啲假雪有少少失望

－

白雪天地 The White Planet 

地址：D2 Place 一期天台花園（乘搭升降機往十樓，沿樓梯直上）

開放日期：2017 年 12 月 2 日至 2018 年 1 月 1 日（逢星期二暫停開放，12 月 26 日除外）

開放時間：12pm - 9pm

－

影完相同星星行吓街，見到部珍寶珠夾糖機，俾＄5 佢玩吓啦（媽咪心諗邊有咁易夾到呀…）

點知星星真係勁好彩，一下禁到兩粒糖出黎，仲鬼咁開心，媽咪唯有破例俾佢食一粒啦！

Pixar 動畫展 - 香港文化博物館

2y4m

香港文化博物館今年再度同 Pixar 合作，以友情同親情作為主題

製作《彼思動畫30年：家＋友‧加油！》嘅展覽，場內分為十一個展區

以 Pixar 經典動畫作為主題，展出多張手繪素描稿、油畫、分鏡圖、初稿同樹脂模型

有 Toy Story、Monsters University、Inside Out、Up、Cars、Wall E、The Incredibles 等等

星星不嬲好鐘意睇 Pixar 嘅戲同書，其中佢最鐘意嘅係 Toy Story，第一至三集都睇到滾瓜爛熟

媽咪一話同佢睇巴斯就已經好雀躍，仲以為有得去 Disney 添 🤣

我地去到門口就見到 Inside Out 嘅角式，星星最鐘意係呀燥同呀愁，次次見到呀愁都會呵返佢

入到博物館買飛，星星未夠四歲免費入場，大人票要二十蚊

買飛入場仲會送場刊同 Pixar memo 紙，媽咪好鐘意呀！

電梯門口有 The Incredibles 一家，星星曾經連續睇呢本書幾十次，所以都好熟悉啲角色

上到一樓就去睇 Pixar 展覽，門口有個 video 不停播返 Pixar 嘅經典動畫，星星睇到入哂神

展覽廳會根據唔同動畫畫分成不同展區，星星對啲畫冇乜興趣，反而係媽咪鐘意睇多啲

每個展區中間都擺咗經典角色嘅立體雕塑

睇完展覽仲可以出去同怪獸公司同麥坤影相添！

星星好鐘意麥坤，即刻叫媽咪幫佢影相，仲識擺返佢個招牌 pose 🤩

睇完一樓去返地下搵巴斯影相，經過 Pop-Up Store，賣會場限定嘅 Pixar 產品，出面無得賣

最特別係可以 DIY 衛衣、手機殻、尿袋同咕𠱸，可以自己揀顏色、圖案，什至加名都可以

星星入到去俾啲玩具吸引住，樣樣都想買，媽咪話淨係可以揀一樣，佢最後揀咗巴斯遙控車

離開 Pop-Up Store 去到兒童探知館門口，就見到巴斯同三眼仔喇

星星仲話要送岩岩新買果架遙控車俾巴斯，將心愛嘅野送俾心愛嘅人 🤣

星星同三眼仔影相又擺佢個招牌 pose，後面排緊隊嘅姐姐都話佢好搞笑，識自動擺 pose

今次星星睇得玩得買得好開心，個展覽去到出年三月先完，媽咪遲啲一定要再帶星星去多次！

－

Pixar 動畫30年：家＋友‧加油！

地址：沙田文林路一號 一樓專題展覽館及地下香江童玩展廳

展覽日期：2017 年 11 月 18 日至 2018 年 3 月 5 日

Miffy 之拯救海洋｜中間道遊樂場 - 尖沙咀

22m22d

科學館逢星期三免費入場，宜家又有 Miffy 展覽，好岩小朋友去玩

我地大概 12pm 去到，唔洗排隊就有得入場

最底果層有巨型祿豐龍化石，恐龍迷星星企定定好認真咁觀察咗好耐

而另一邊有好多非洲草原嘅動物，星星以為佢地係真，係咁同佢地 say hello

一樓有個展覽廳關於職業安全健康，星星入到去見到啲假嘅地盤工人話「驚驚」😂

媽咪望下佢地個樣又幾恐怖喎，記得細個去科學館都見過果個博士，個樣十幾年不變

三樓兒童天地最岩星星，睇完 Miffy 再玩「圓球滾滾溜」玩到唔捨得走

我地係科學館大概玩咗兩個鐘，離開果陣已經見到出面要排長龍先入到

－

Miffy 之拯救海洋

地址：尖沙咀東學館道二號香港科學館三樓展覽廳

展覽日期：2017 年 4 月 7 日至 2017 年 10 月 11 日

見時間仲早，就順路去埋中間道遊樂場

係漆咸道南、梳士巴利道交界嘅港鐵尖東站平台上面（由科學館慢慢行過去大概十分鐘）

途中聽到有直升機飛過，星星勁興奮話俾媽咪知有飛機係上面

去到公園見到有個哥哥玩緊，佢即刻走埋去捉住人

兩個跑黎跑去，媽咪都冇哂氣追，由哥哥同佢好好放電