【杜拜 8 天親子自駕遊】朱美拉露天市場｜運河遊船｜朱美拉公眾海灘 - Day 2

2y6m

行程：Black Tap－朱美拉露天市場 Souk Madinat Jumeirah－運河遊船 Abra Tour－朱美拉公眾海灘 Jumeirah Public Beach－Al Safadi Restaurant－Fraser Suites Hotel

第二日等星爸瞓醒已經十點幾喇，即刻出發去朱美拉古城運河酒店渡假村食 lunch

朱美拉古城運河酒店渡假村 Madinat Jumeirah 係同帆船酒店同一個集團

呢個渡假村有四間酒店，以傳統杜拜建築同運河水道，重現昔日杜拜灣嘅古城風貌

入面有市集、劇場、水上樂園同沙灘，仲可以免費搭 Abra 遊運河，係酒店玩足幾日都得！

我地泊好架車係 Jumeirah Al Naseem，經過九曲十三彎，終於黎到海龜保育池

好多唔同風味嘅餐廳係海龜池附近，酒店房就係正上面

如果每朝一起身都可以望到咁迷人嘅風景真係精神呀！

真係會見到海龜架！有成十幾隻海龜係度游水曬太陽

酒店每年都會拯救受咗傷嘅海龜，擺佢地黎呢度治療同保育，等佢地好返就會放返杜拜灣

同星星睇完海龜就去 Black Tap 食 lunch

媽咪之前係網上見到 Black Tap 嘅 crazy shake 就已經覺得好吸引

即刻叫咗杯 Cotton Candy Strawberry Shake，好靚好靚好靚不過亦都好甜好甜好甜

星爸同星星就食 burger 同 fish and chips，不過不失啦

－

Black Tap

地址：906 Jumeira Road, Umm Suqeim 3, Dubai, U.A.E

電話：+971 4 422 9904

食飽就去附近嘅朱美拉露天市場 Souk Madinat Jumeirah 行古城

呢度嘅設計係仿照傳統露天市集，建築一啲都唔馬虎，每個角落都充滿阿拉伯味道

古城嘅裡裡外外都有好多小商店，賣手信紀念品、畫像、手工地毯、傳統服飾等等

中間有個露天廣場，行到攰可以係 coffee shop 休息吓

星星好難得地趁我地行街瞓晏覺，等媽咪可以慢慢四圍行

經過間傳統服飾舖頭，見到有件長袍 kandoura 連埋頭巾好岩星星著

忍唔住買咗套俾佢，俾錢時又忍唔住幫星爸買，星爸又慫恿媽咪一齊買

於是我地一家三口每人都買咗套，準備聽日去謝赫扎耶德大清真寺大派用場

呢度買野一啲都唔平，講咗價都要五百幾港紙一套 💸

等星星瞓醒我地就去搭 abra ride，係古城入面嘅 Souk Abra Station 買飛

由於我地唔係呢個渡假村嘅住客，所以成人要俾 85 AED，小童要 50 AED

買好飛後要等二十分鐘先有船，碼頭嘅風景好迷人

雖然係二月，但杜拜中午都有成三十度，好猛太陽 ☀️好彩唔似香港熱得黎咁黐立立

話咁快等到我地上船喇

渡假村由呢條人工運河貫通幾間朱美拉酒店、餐廳同購物中心，沿途見到嘅建築物都係酒店客房

去到運河盡頭終於見到鼎鼎大名嘅帆船酒店喇～～～船家停定隻船俾我地慢慢影相

成個船程大概二十分鐘，欣賞完帆船酒店就沿路折返，係返 Souk Abra Station 落船

－

Abra Tour

營業時間：10am - 11pm（冬季）11am - 11pm（夏季）

電話：+971 4 366 8888

星星瞓醒晏覺好好精力，我地就帶佢去附近嘅朱美拉公眾海灘 Jumeirah Public Beach 玩水

如果想一邊玩水一邊欣賞帆船酒店，最近嘅就係呢個公眾海灘

因為附近嘅沙灘都係 private，要酒店住客先可以入去

星星好鐘意去沙灘玩，係小賣部買咗啲沙灘玩具俾佢砌城堡

玩咗個幾鐘，雖然媽咪係咁幫星星補搽太陽油，但都見到佢明顯曬黑咗好多 👦🏿

玩完去 Al Safadi Restaurant 食黎巴嫩菜晚餐，黎杜拜食嘅第一餐中東菜

餐廳門口有位泊車，見仲未天黑又開始涼涼地，我地就坐戶外

一坐低就有幾款前菜漬物，好酸嘅黃瓜同好酸嘅豆同好酸嘅豆同好酸嘅豆

媽咪麻麻地鐘意食豆，所以試咗一粒之後都冇掂過 😅

仲有 free refill 嘅薄餅，雖然好淡口，但星星玩完水超肚餓，大啖大啖食咗幾塊

上網睇 Grilled Chicken Wings 係呢度嘅招牌菜，真係冇介紹錯 👍🏻

雞翼皮烤到好脆，一咬落去啲汁咇哂出黎，而且雞肉好嫩滑

雞翼用咗檸檬、蒜頭、辣椒同其他香料去醃，配埋白色個 yogurt 醬食好有中東風味

一碟得六隻真係唔夠食，媽咪一個人都可以啪哂成碟

我地仲叫咗 Hummus with Meat Shawarma（右上）同 Grilled Chicken Kafta（右下）

牛肉 Shawarma 麻麻地，有啲 “鞋” 口，而且都幾重口味

反而媽咪鐘意雞串燒，將醃過嘅雞肉同蔬菜搞碎再拎去烤，唔油膩仲好入味

－

Al Safadi Restaurant

地址：19 3 St, Umm Al Sheif, Dubai, U.A.E

電話：+971 4 333 6665

【杜拜 8 天親子自駕遊】哈里發塔｜杜拜水族館｜杜拜購物中心｜杜拜音樂噴泉 - Day 1

2y6m

行程：哈里發塔 Burj Khalifa (At.mosphere)－杜拜購物中心 Dubai Mall－杜拜水族館 Dubai Aquarium & Underwater Zoo－Texas Roadhouse－杜拜音樂噴泉 Dubai Fountain－Fraser Suites Hotel

等到頸都長終於有得新年去旅行喇，今次去遠少少出發中東，離開香港避寒

仲有得坐 Emirates 嘅 A380，一家大細三個人機票夾埋＄14xxx

香港飛杜拜要八個鐘，星星第一次坐咁耐飛機，好彩係凌晨機

星星係飛機未起飛前已經瞓咗，瞓到臨降落前十五分鐘先起身，實在太好喇！

飛到杜拜係當地時間 5am，星爸同媽咪都瞓得麻麻地，反而最精神嘅係星星

一落機去租車公司拎車，跟住就出發去哈里發塔嘅 At.mosphere 食早餐

去旅行前做咗少少 research，去 At the Top 哈里發塔（124＆125 層）要 135 AED 一個人

但去 At.mosphere（122 層）食早餐 min spend 都只係 200 AED 一個人，星星未夠五歲唔計

而且 At.mosphere 淨係得早餐時間可以招待未夠十歲嘅小朋友，計落好似去食早餐抵啲！

我地係哈里發塔隔黎嘅 Armani Hotel 入去

搭 lift 直上去到 123 層，再行返一層落 At.mosphere

Book 咗 8am，可能時間仲早，餐廳入面都係得幾枱客人

Book 枱時 request 咗要窗口位，雖然媽咪仲好眼瞓，但望住杜拜朝早嘅景色食早餐即刻精神哂

媽咪叫咗個 Full ATM Breakfast，星爸就食 Lobster Scrambled Eggs，超超超超超好味 😋

星星食小朋友嘅 mini breakfast Brioche French Toast，都唔錯呀！

－

At.mosphere Restaurant

地址：122nd Floor, Burj Khalifa, Downtown Dubai, U.A.E

電話：+971 4 888 3828

慢慢嘆食咗兩個鐘就出發去哈里發塔隔黎嘅 Dubai Mall

呢個 shopping mall 好巴閉，係全球最大型嘅購物中心，連出面嘅音樂噴泉亦都係最球最大

入面有超過 1200 間舖頭，真係咩牌子都有，而且仲有水族館、溜冰場、鬼屋等等

同星星去旅行一定要去水族館啦，泊好架車係 Cinema Parking P7，就搭 lift 去 2/F

（千奇唔好求其泊，因為 Dubai Mall 有 50 個標準足球場咁大，泊錯咗停車場就有排行喇！）

我地去到水族館入口買飛，售票處隔黎就有一個極大嘅魚缸，好吸睛！

一入水族館會經過條海底隧道

星星靜靜欣賞啲魚係佢頭頂同身邊慢慢游過，好似置身係海底世界咁

出咗隧道，搭電梯去到水族館嘅內部，一個好似實驗室嘅地方

呢度可以玩 Shark Dives 同坐玻璃底遊覽船（當然要買 ticket 啦）

另外亦都有講解員免費即場示範餵小鯊魚，大概睇咗五至十分鐘，匆匆忙忙地餵完，冇乜驚喜

行完水族館我地就黎到 Underwater Zoo，入面有其他海洋動物

媽咪最鐘意 jellyfish，次次去親水族館都一定會影吓佢地 ❤️

另外仲有啲大型少少嘅動物，好似水獺、企鵝、鸚鵡、鱷魚等等

有條樹屋吊橋好得意，可以係動物園上面穿梭

星星初頭行上去都有啲驚，但好快就好鐘意係上面跑黎跑去

－

Dubai Aquarium & Underwater Zoo

地址：Ground & Level 2, The Dubai Mall, Dubai, U.A.E

開放時間：10am - 12am，最遲入場 11:30pm

玩完水族館就係 Dubai Mall 食埋晚餐先，我地去 Texas Roadhouse 食西餐

杜拜嘅夜晚唔太熱，所以揀咗坐係室外，仲可以睇到少少杜拜音樂噴泉

每張枱都有一大桶 free refill 花生，我地嗌咗牛扒、烤三文魚同 mini cheese burger

點知…中伏了！真心覺得難食，樣樣都好鞋冇肉汁，特別係星星個 burger，佢食咗幾啖就停口

其實餐廳嘅四周都好舒服，有燈飾有夜景又有音樂聽，如果呢餐唔係咁難食就 perfect 喇！

我地嗱嗱聲食飽就係附近行吓，係音樂噴泉前面有呢個打卡熱點 I ❤️DUBAI

夜晚嘅哈里發塔，真係好好好好高呀，如果宜家先上去睇夜景一定一流呀！

周圍行咗陣終於等到有得睇音樂噴泉喇 ⛲️

每條色彩鮮艷嘅發光水柱隨住音樂而擺動，難怪會成為杜拜最著名嘅表演

杜拜音樂噴泉嘅噴泉編排系統係全球最大，每晚由 6pm - 12am 每隔三十分鐘就有一場表演

如果想近距離睇清楚啲可以上 At the Top 官網買飛（20 AED）

睇完表演星星都開始冇電喇，出發返酒店

係 Hotels.com book Fraser Suites Hotel 呢間酒店，平均＄1400 一晚

我地訂咗 Deluxe Apartment，1 房 1 廳仲有埋廚房同洗衣機

岩哂早起嘅星星起身唔會嘈醒訓到黃朝百晏嘅星爸，又岩哂好鐘意邊去旅行邊洗衫嘅媽咪 😙

【塞班島 7 天親子自駕遊】塞班國際機場 SPN - Day 7

2y

行程：塞班國際機場 SPN

我地班機係 04:40am，2am 去到機場已經排好長籠等 check-in

星爸去還車，星星半夢半醒咁乖乖同媽咪排隊

過咗關星星都醒哂，仲跑黎跑去，星爸同媽咪都攰到追唔郁

好在上到飛機星星飲完枝奶又瞓過，飛五個鐘，返到香港係七點半

星星好乖幫媽咪等行李，小朋友永遠都有無窮盡嘅體力

呢個 trip 星星好似大個咗，唔再驚沙驚水，宜家見到沙灘會即刻衝入去玩

見多咗陌生人，冇咁慢熱又突然間識講好多野，媽咪終於都放下心頭大石喇 😌

希望下次有機會再一班人一齊去旅行啦！

【塞班島 7 天親子自駕遊】鳥島｜日軍最後司令部遺址 - Day 6

2y

行程：鳥島 Bird Island－日軍最後司令部遺址 Last Command Post－塞班清泉酒店 Aqua Resort Club－DFS Galleria

今日算係我地最後一日係塞班島喇，執好行李就 check out

繼續 road trip 遊塞班島嘅北面，出發去 Bird Island 鳥島

鳥島顧名思義就係好多雀仔嘅島，雖然不斷聽到有雀仔叫聲，但淨係睇到得幾隻雀仔飛過 😂

（可能撞唔岩時間…）

見冇乜野睇就繼續兜去北面，去到 Last Command Post 就落車睇睇

原來呢度曾經係原子彈嘅地下儲藏庫，仲有二戰時遺留落黎嘅坦克同大炮

星星一見到大炮就好興奮，係咁「boom…boom…boom」扮打星爸

後山有條樓梯可以上去一個洞穴，應該就係當年最後被攻入嘅司令部

上到去好靜，講野有回音，有啲毛管戙，媽咪行咗個圈都急急腳走人 😅

夜晚我地諗住去塞班清泉酒店 Aqua Resort Club 度食 Sunset Beach BBQ

點知…我地去岩酒店不過去錯餐廳 😫去到酒店求其入咗間餐廳食 buffet

天呀！食食吓發覺唔對路先知去錯地方，個 buffet 冇乜野揀之餘仲要好難食

（唯有當買個教訓啦…）下次要睇清楚餐廳個名先好入去

求其係 buffet 食咗少少野就去 DFS Galleria shopping 買手信，全部都係名店，冇收穫

隔黎有間 I Love Saipan 都有幾多手信賣，媽咪仲搵到 Badger 防曬 cream

一直用開 Badger 呢個牌子，有機全天然成份，得到美國 Natural Products Association 認可

小朋友都用得，尤其係星星有濕疹，所以呢個牌子好岩佢

星星呢個 trip 都係用 Badger Unscented Broad Spectrum Sunscreen Cream SPF 35

另外有隻 Anti-bug Sunscreen 有埋防蚊防蟲，好岩平時去公園／多蚊嘅地方

防蚊產品仲有蟲膏（盒裝／支裝）同噴霧

有時星星俾蚊針到／抓傷，媽咪會幫佢揸 Badger Balm for Working Hands

呢隻萬用急救膏有效舒緩皮膚嘅乾裂，好好用 👍🏻

媽咪掃咗好多好滿足，平過係香港嘅 online shop 好多

今晚我地冇 book 酒店，因為聽朝凌晨機，我地就係車入面恰住等上機，星星都瞓到成隻豬咁

【塞班島 7 天親子自駕遊】美人魚號潛水艇｜勞勞海灘｜禁斷島 - Day 5

2y

行程：美人魚號潛水艇 Submarine Tour－勞勞海灘 LauLau Beach－禁斷島 Forbidden Island－金八 Kinpachi Japanese Restaurant－Fiesta Resort and Spa Saipan

應該係呢個 trip 最期待嘅行程－Submarine Tour，有人係酒店 pick up 我地去碼頭

再搭小輪去到海中心轉潛水艇，係星星最鐘意嘅 Yellow Submarine 呀！即刻聽返 Beatles 首歌

"We all live in a yellow submarine, yellow submarine, yellow submarine."

潛水艇有左右兩邊，我地坐左邊，有好大隻窗可以望到出面

落到水底後船長開咗燈，又掉啲魚糧引啲魚埋黎，慢慢就有越黎越多魚游過黎

啲魚群係珊瑚度游黎游去好靚，間唔中會見到細鯊魚同海星，有啲眼瞓嘅星星都睇得好入神

慢慢我地去到二戰時被擊落嘅軍艦同戰鬥機殘骸，上面舖滿青苔

雖然啲水唔係好清，但都感受到有啲陰森恐怖 🌀

成個 Submarine Tour 大概四十五分鐘，去返碼頭後會有人車我地返酒店

星星係車度瞓著咗，星爸去買外賣係車食

有 Cha Cafe & Bakery 嘅咖啡同隔黎 American Pizza and Grill 嘅 pizza 同 spaghetti

一路食一路遊車河，兜咗去塞班島嘅東面

經過 Lau Lau Beach，係塞班島最出名嘅潛水地點，見到好多人都成副裝備去呢度潛水

我地同星星係附近影相，塞班島嘅天空特別藍，景色一流 👍🏻

兜兜下去到 Forbidden Island，呢度係海龜繁殖嘅地方

水漲時禁斷島同塞班島睇落好似分開咗，水退時先會見到佢地有啲地方係相連

星星都好乖企定定俾媽咪影相，仲識個身微微向後擺 pose

遊完車河我地就返酒店泳池游水，小童池有 sir 滑梯，星爸抱住星星 sir 得好開心

媽咪部 GoPro 終於有得用喇，星星不停倒水，媽咪就做攝影師幫星星影相

星星連續玩咗幾日水，好似唔再咁抗拒啲水係佢塊面度，叻叻呀！

我地間房望出去嘅日落 🌅平靜嘅 Micro Beach 加橙黃色夕陽

夜晚去酒店對面嘅金八 Kinpachi Japanese Restaurant 食飯，我地揀咗坐出面，熱到嘔 😵

星爸食燒龍蝦，好大隻龍蝦鉗仲好 juicy，星星都第一次飲椰青，好味到停唔到口

【塞班島 7 天親子自駕遊】麥克海灘 - Day 4

2y

行程：Bubba Gump－麥克海灘 Micro Beach－Fiesta Resort and Spa Saipan

今日要轉酒店所以遲咗出去，執好行李後去 Bubba Gump 食 lunch

好耐之前係 LA 食過 Bubba Gump，黎到塞班島又試吓先

有 kids menu，嗌咗個 shrimp linguine 俾星星，好好味呀 😋 星星都搶住食

大人就喪食蝦同牛扒，都好有水準，算係塞班島 Top 3 好味嘅餐廳

Bubba Gump 入口有佢地嘅 souvenir 同童裝賣，不過童裝質地麻麻，媽咪都冇買俾星星

－

Bubba Gump

地址：Beach Road, Garapan Saipan, CNMI 96950

營業時間：11am - 11pm

－

食飽就去 Micro Beach，係我地黎緊會去住果間酒店（Fiesta Resort and Spa Saipan）出面

啲沙好幼，踩落去唔吉腳，而且我地四點先去，太陽冇尋日去軍艦島咁曬，星星可以盡情玩

星爸同星星砌水霸，星星仲搞到成頭都係沙，沖涼實有排洗 🤨

夜晚係酒店食，一路睇 show 一路食 buffet，有肚皮舞同 live band，MC 又識搞氣氛

雖然食物好普通，都係肉類同 salad，但味道都 ok，都岩星星胃口 

【塞班島 7 天親子自駕遊】軍艦島 - Day 3

2y

行程：軍艦島 Managaha Island－The Naked Fish－Airbnb 度假屋

我地經 Airbnb 嘅屋主幫我地訂咗去軍艦島嘅船，一早出發去碼頭

今日嘅塞班島超級曬，揸咗好多防曬都仲係覺得唔夠，媽咪唔想變黑呀 ☹️

去軍艦島嘅船程只需要大概十分鐘，軍艦島四周都係白色嘅沙灘，好似一個與世隔絕嘅世外桃園

不過軍艦島係二戰時曾經被美軍誤以為係日軍軍艦，一度被瘋狂轟炸，所以叫「軍艦島」

＊軍艦島都有休息時間架，遊客下晝五點就一定要離開個島

係島上可以玩好多水上活動，香蕉船、海上滑翔傘、潛水、浮潛、海底漫步、水上電單車等等

我地一家係沙灘玩吓沙玩吓水，啲水好清架，我地間唔中都會見到有一群魚游過

媽咪不停幫星星補太陽油，最後索性一大 pat 撻落去，真係好！曬！呀！☀️

難得星星唔再驚沙，就俾佢係沙灘玩耐啲

玩到攰去咗島嘅中間食少少野，佢地有個劣食 buffet，如果唔係餓到暈都唔會食

星星飲咗個椰青就攰到瞓咗，媽咪抱住星星係樹底瞓，星爸就出去浮潛，好羨慕 😭

我地玩到下晝三點幾就走喇，返度假屋沖涼（軍艦島得露天沖身，廁所又比較污糟…）

沖完涼就準備出去食飯，遊車河時途經一個沙灘有埋公園，又停低睇吓風景

星星熱到淨係著住片片，連褲都唔著 🙈

塞班島嘅日落都好靚，可惜媽咪影相太水皮，影唔出果種日落好浪漫嘅感覺

遊車河時無意中搵到 The Naked Fish，係海邊裝潢又好似好舒服，感覺應該幾好味

嗌咗個好出名嘅 Garlic Fish，油淋淋又唔係特別太好味，連星星個 Spaghetti 都麻麻地

反而薯條同 Buffalo Wings 幾好味（因為好難整得唔好味…）所以唔推介呢間餐廳呀

【塞班島 7 天親子自駕遊】美國紀念公園｜萬歲崖 - Day 2

2y

行程：iHop－美國紀念公園 American Memorial Park－萬歲崖 Banzai Cliff－Himawari－Airbnb 度假屋

我地間度假屋有兩層層間房兩個廁所，岩岩好夠我地八個人住

星星第一次同其他人同一屋簷下，媽咪初頭都驚星星太早起身嘈醒其他人

但由於尋晚太夜先瞓，星星都瞓到十一點幾先起身（平時佢七點幾就起身）

媽咪一腳踢幫星星沖奶、換片、換衫、刷牙、洗奶樽、執行李

到所有人都起哂身我地就出發去 iHop 食飯

之前係美國讀書果陣都有去過 iHop，最出名係 pancake 同 Hash browns

但印象中好似都係美國嘅 iHop 好味啲 🤔

食飽後就出發去塞班島嘅第一個景點喇～美國紀念公園 American Memorial Park

一個為咗紀念係第二次世界大戰中犧牲嘅塞班島軍人而建嘅公園

呢個公園超級大，除咗有網球場、野餐區同大草地之外，仲有一個紀念二次世界大戰嘅博物館

收藏咗軍隊嘅武器、軍服同相片等等，我地都有入去行咗個圈（免費入場）

星星好明顯就冇乜興趣，媽咪寄完 postcard 後就同星星出出面草地玩吓

塞班島真係太好陽光，係戶外一陣已經熱到頂唔順，星星都跑到紅都面哂

－

美國紀念公園 American Memorial Park

地址：Beach Road Saipan, MP 96950

第二個景點 Banzai Cliff 萬歲崖（自殺崖）背後嘅歷史故事好悲慘

當時日軍同美軍打仗，最後日軍剩返千幾人留守，佢地唔想做美軍嘅俘虜

於是帶同家屬一齊去塞班島最北嘅地方－萬歲崖－跳崖自殺 ☹️

萬歲崖周圍嘅風景好靚，塞班島嘅天空特別藍，望住一望無際嘅大海，真係好舒服

有架小賣車係景點附近，星星第一次試食雪條，tangerine 味好特別，不過星星唔多鐘意食

夜晚去 Himawari 食飯，係好美式嘅日式餐廳，我地全部人都好肚餓，不停嗌咗好多 sushi

媽咪讀書時好鐘意食 Dragon Roll，黎到依度有得食番喇

壽司飯包住炸蝦天婦羅，有牛油果同蟹子係上面 ，好掛住呢隻卷呀！

星星食果個雞肉烏冬都好好味 👍🏻

Himawari 隔黎有個日式超市，食飽去果度買埋乾糧同水，仲有格仔餅雪糕添！

－

Himawari

地址：Bukiki Ave., Garapan, Mariana Islands

營業時間：11:30am - 2pm；5pm - 9:30pm