星星約咗好耐冇見嘅朋友仔一齊去 Origami Kids Cafe 玩
超級路痴媽咪去到郵輪碼頭盪失路，周圍又冇人冇得問路，兜咗好耐先搵到 😫
星星同媽咪跑咗大半個郵輪碼頭平台，終於黎到喇！
一去到紙飛機門口就要除鞋、探熱同消毒手仔，大人可以著餐廳提供嘅拖鞋
我地 book 咗下晝四點，呢個時段唔係 full booking，所以唔係好多人，感覺唔太逼
等埋朋友仔黎就嗌野食，好肚餓望住個 menu 揀唔落手（下午茶時間食中菜怪怪地 😅）
最後揀咗蝦仁炒蛋、糖醋骨同黑松露炒飯，味道都 ok，最好味反而係蘋果汁，夠哂解渴
呢度嘅用餐區係正中間，小朋友可以係開放式設計嘅玩樂區度玩
就算星星掛住玩唔食飯，媽咪都可以好放心咁一路食野一路望住星星玩
星星不嬲都好鐘意玩煮飯仔，見到有咁大個廚房好開心，仲拎住個籃扮買餸煮飯俾媽咪食
媽咪好鐘意呢度嘅玩具，全部都係木製，唔會有發光同發聲嘅玩具，減少對小朋友嘅刺激
玩完煮飯仔就同朋友轉戰木粒沙池，啲木粒天然又環保，不過要小心唔好俾小朋友吞落肚
星星同朋友仔玩得好開心，互相將啲木粒倒落人地個頭度
木粒沙池係正落地玻璃隔黎，仲可以同星星睇到日落添 🌅
沙池上面係一間樹屋，有得玩木製火車，星星好享受喱係佢個「小天地」
不過上樹屋條樓梯好窄好斜，落樓梯時要小心
沙池側邊仲有木製滑梯，sir 落黎都幾快，星星玩咗一次大叫「好玩！」即刻轉身跑去玩多次
Origami Kids Cafe 仲有個閱讀區，星星對啲書唔多有興趣
淨係鐘意爬到最高係上面跳，媽咪睇見都牙煙 🤦🏻♀️（唔好咁百厭啦…）
星星玩咗兩個鐘都意猶未盡，天黑喇要返屋企，下次黎可以去埋親子餐廳出面放電！
－
Origami Kids Cafe
地址：九龍灣承豐道 33 號啟德郵輪碼頭 B 區北面平台 3 樓 N305 室
電話：6063 7470
營業時間：10am - 8pm
