2y6m
星期六 family day 又同星星去行山喇，今次揀咗條超易行嘅大帽山家樂徑
我地渣車去到郊野公園附近泊低，行咗一段斜路就見到大帽山郊野公園喇
今日好凍好凍，星星好似仲係一舊雲咁未瞓醒
行過小賣部會見到大帽山家樂徑嘅牌
沿住石級一路行，星星好鐘意執地下嘅樹枝周圍挖
人仔細細已經知道啲蛇會匿係樹葉同樹窿果度
行咗冇幾耐就見到有條溪澗，星星見到雙眼發光 🤩
即刻拖住星爸去 dump 石頭，星星仲話啲石頭好似 poo poo咁，吹…漲 😂
玩咗一輪又繼續行，黎到扶輪公園嘅燒烤場
見到扶輪公園自然教育徑就差唔多行完喇，今次真係好快就行完
我地仲見到有人燒野食好香呀，星爸話下次行山一定要燒野食 🤤
星星都一齊食餅充肌，今次行咗大半個鐘都唔洗抱（因為真係好短程…）
下次等天氣冇咁凍可以挑戰吓行耐少少喇！
－
大帽山家樂徑
交通：港鐵荃灣站搭 51 號九巴到荃錦坳郊野公園站
長度：約 0.5 公里
需時：一小時（連影相）
2y5m
今日落住微微細雨，仲凍凍地，扎到星星成隻稯咁，揀條超簡單嘅小夏威夷徑行
揸車去到井欄樹村，附近有啲咪錶位，泊好車後就出發喇
跟住「澳頭村／新地村／ 心朗」嘅路牌行入去，呢個就係衞奕信徑第三段嘅入口
沿途見到有人放狗，星星見到狗狗好開心 😝
衞奕信徑好易行，全部係平路同小小樓梯級，行咗十分鐘就見到小夏威夷徑個路牌喇！
行入去就見到一大片山坡草原，綠油油嘅草地好有大自然氣息 🌳
如果今日個天唔係灰濛濛嘅話，相信呢度嘅風景一定會更加靚！
星星拖住星爸小心翼翼慢慢行，好快就行入樹林喇
一路都係行落斜，今日嘅地下好濕，星爸都差啲跌倒，好在星星拖住星爸咋 😌
穿過樹林後終於去到小瀑布水霸，離遠已經聽到瀑布嘅流水聲
呢度曾經係一個叫「小夏威夷」嘅私人游泳場，後尾因為有人遇溺而被拆咗
媽咪好想行過去水霸果邊影瀑布，可惜啲大石頭濕淋淋又佈滿青苔，唯有下次再黎影過啦！
欣賞完瀑布繼續向前行，沿途見到有啲休憩枱櫈，見星星行到有啲熱，我地就休息吓
繼續行會經過一條小橋（小夏威夷瀑布上游）可以望到瀑布頂同將軍澳一帶
沿住小徑落山，最後會去到十字路口
跟住「澳頭」方向行十分鐘，就可以參觀多次小夏威夷瀑布
跟住「將軍澳村」方向行，就會去到小夏威夷徑嘅終點，係將軍澳村出口離開
星星今日好叻仔呀 👍🏻 雖然到最尾都要星爸抱，但都肯自己行咗一大半路程，有進步！
希望下次好天再黎過，可以落埋水玩啦！
－
小夏威夷徑
交通：鑽石山港鐵站搭九巴 91／ 92／91M／91P／96R 到井欄樹站
長度：約 2.8 公里
需時：一小時（連影相）
2y5m
同星星第二次行山，諗住揀啲比較易行嘅家樂徑（但…中伏了 😖）
星爸揸車去到錦上路西鐵站，泊好車後搭 71 號綠 van 去到河背村總站落
係河背村入口向前行，穿過條村轉左就開始行上山
其實呢條上山路唔太斜，不過好長好長，星星都好乖肯行，沿住山邊嘅芒草一路向上行
行咗大概二十分鐘去到河背露營場，有人係度紮營同 BBQ
露營場左手邊係去雷公田，有條小溪澗，有兩隻狗狗係度游水
望落去啲水好清好乾淨，星星好想落去玩水，但我地仲要趕係太陽落山前去到河背水塘呀！
露營場右手邊有條更長更斜嘅上山路，我地就係要行呢條路先上到河背水塘家樂徑 😩
媽咪望住條一望無盡嘅長命斜都心感不妙，星星行咗咁耐開始攰要抱
我地係咁鼓勵星星繼續行，佢每行一段路就俾佢飲一啖果汁獎勵佢
途中會經過青協有機農莊，俾入場費就可以參觀農田，仲可以買有機菜添
再行多二十分鐘，終於見到河背水塘家樂徑個牌喇，好～攰～呀！
星星終於頂唔順要星爸抱，其實星星都好犀利 👍🏻人仔細細都可以行到大半個鐘斜路
河背水塘家樂徑其實係一個大圈圍住河背水塘，算好易行，條路夠闊夠平坦，得少少樓梯級
大人行大概四十五分鐘，如果同埋星星一齊行就要一個鐘
星爸抱住星星沿住家樂徑一路行，一路問佢自己落地行得唔得呀，但都俾星星拒絕 😝
行到一半有條長木凳可以望到水塘嘅景色，我地坐低休息咗陣，星星又好似差滿電無啦啦跳舞
抖咗一陣又要出發喇，星星繼續要星爸抱，仲好嗲咁僕係爸爸度嗌「爸爸加油」
媽咪真係要唱返句「如孩兒能伏於爸爸的肩膊，誰要下車」辛苦哂星爸喇！
沿途經過小橋、溪澗，流水、竹林，遠離繁囂，俾星星靜靜地親親大自然
真係足足行咗一個鐘，終於去到水塘喇！呀仔，我地做到喇，終於去到終點喇！😭好感動
岩岩好趕得切見到太陽落山，個夕陽真係好靚呀
水塘中間有個小島，側邊仲有個好宏偉嘅 S 型水壩，係河背水塘嘅 signature
咁辛苦行到上黎係值得架！世外桃園嘅河背水塘，景色真係一流 👍🏻
－
河背水塘家樂徑
交通：錦上路西鐵站搭 71 號綠色小巴到河背總站
2y4m
星星行山初體驗，揀咗條超岩 beginner 行嘅菠蘿壩自然教育徑
菠蘿壩自然教育徑係城門郊野公園入面，全長八百米，行大概一個鐘（唔知星星要行幾耐呢…）
今日天氣好好，陽光充足又唔會太熱，一落車就見到好多馬騮，媽咪仲驚過星星 🙈
我地三點半出發，沿住樓梯行上去遊客中心，再跟指示標方向行就開始喇～～
沿路行間唔中會有幾隻馬騮出沒，星星開頭驚佢地唔肯落地行，要星爸抱住
我地行吓停吓欣賞吓城門水塘嘅風景，又執地下啲樹枝石頭玩，星星好快就自己行返喇
行咗十五分鐘黎到引水道，食水流入城門水塘
途中有幾個位有溪澗，星爸同星星落去掉石頭，星星玩得好開心
見到蝴蝶園已經行咗一大半，啲路好闊，唔洗驚小朋友會碌落山
行到尾段星星都發力係咁跑，又見到馬騮係樹上面
拜拜喇馬騮仔，下次見！👋🏻
去到終點岩岩好五點，我地用咗個半鐘行哂成條菠蘿壩自然教育徑
星星第一次行山好叻叻呀，自己行咗一大半路程，下次可以挑戰第二條路線喇！
－
菠蘿壩自然教育徑
交通：荃灣兆和街搭 82 號小巴到城門水塘菠蘿壩總站
