國際綜藝合家歡 2017 節目：《蔬果扭扭樂園》- 沙田大會堂

23m21d

第一次同星星睇舞台劇，揀左套好適合三歲以下嘅小朋友睇

《蔬果扭扭樂園》係 2012 年首演後備受矚目，跟住就巡迴世界各地演出

丹斯瑪舞蹈劇院係立陶宛第一個專為嬰幼兒創作現代舞蹈作品嘅劇團

舞台上奇形怪狀、色彩鮮艷嘅蔬果拼圖，伴隨住三位舞者嘅躍動

一陣變成巨型紅蘿蔔，轉眼又變成長長嘅青瓜

運用小朋友最熟悉嘅肢體語言，演繹出嬰幼兒各個認知發展階段

再配以度身訂造嘅輕快音樂，為小朋友帶黎一場栩栩如生嘅舞台表演

完場後小朋友仲可以同舞者有互動環節，星星拎左個藍色大圓枕周圍碌

同其他小朋友一齊感受係燈光下玩嘅滋味

－

國際綜藝合家歡 2017 節目：《蔬果扭扭樂園》

節目地點：沙田大會堂展覽廳／香港大會堂展覽廳

節目日期：2017 年 7 月 14 至 23 日

節目長度：四十五分鐘

香港動植物公園｜山頂凌霄閣

23m12d

同星星第一次去香港動植物公園，星星呢排好鐘意 🐒，諗住帶佢親身見吓

我地係花園道入口入，媽咪有帶埋 bb 車去，見到咁多樓梯，早知唔帶啦！

一路向上行，見到有好多唔同種類嘅雀仔，又有個兒童遊樂場，同星星係度放陣電先

玩咗陣已經出哂汗，再行上啲去教育及展覽中心涼陣冷氣 🌬

入面有好多動物嘅模型，星星最鐘意係隻豹，眼定定望咗好耐

側邊有個 area 可以俾小朋友睇書同玩玩具，太好喇，媽咪可以同星星休息吓

休息完就出發睇猴子喇，星星見到有咁多猴子好興奮，仲執起地下啲果實諗住俾猴子食 😆

睇完猴子可以經過時光隧道去返山下面

我地沿途慢慢行，好快就去返起點度，媽咪見時間仲早，就決定同星星去轉山頂！

－

香港動植物公園

地址：香港中環雅賓利道

行去山頂纜車總站有段距離，去到仲排咗半個鐘隊

媽咪同星星都係第一次搭纜車 😆媽咪超耐都冇上過山頂喇，唔知有咩睇呢

搭纜車時開始落雨，星星又有少少攰，好彩佢都乖乖坐好冇發脾氣

啲雨越落越大，我地入咗凌霄閣避雨，誤打誤撞入咗「搞錯 3D 藝趣坊」

免費入場，入面有好多 3D 場景可以影相，媽咪都同星星影咗一張做紀念

出返黎見到仲落緊雨，星星又瞓著咗，唯有等下次先去埋凌霄閣摩天台 428 啦！

－

搞錯 3D 藝趣坊

地點：山頂凌霄閣一樓

愉景灣半日遊

23m7d

兩個星期前去完 Discovery Bay 之後一直念念不忘，決定今日再同星星去玩過

我地去到欣澳港鐵站轉 DB03P，係愉景北商場總站落車

一落巴士就去海邊影吓相，今日天氣真係好好呀 🌞

仲要好少人，可以俾星星係咁跑跑跳跳

跑跑吓仲見到有馬車經過，未試過咁近距離見到兩隻黑馬

玩到攰就食 lunch 同埋去 playhouse 玩

第二次去呢間 playhouse 星星好似已經認得路，自己行去佢鐘意嘅 sir 滑梯度

暑假期間多咗好多小朋友，媽咪都要跟住星星爬上爬落

今日實在有太多野玩，平時佢十一點幾就要瞓晏覺

點知今日可以頂到去四點幾先瞓，連媽咪都好驚訝原來佢可以捱咁耐眼瞓

－

EpicLand

地址：愉景灣愉景北商場地下 G31（乘搭 DB03P 由欣澳港鐵站至愉景北商場總站）

牛棚藝術村 - 土瓜灣

23m3d

本身約咗契爺契媽食譽麵坊，中學果時成日食，好有回憶

點知岩岩撞正星期一冇開，山長水遠黎到點知冇得食，下次一定要再黎食過

咁遠出到黎土瓜灣，就順路去牛棚影吓相

牛棚藝術村前身係牛隻嘅中央屠宰中心，宜家變成藝術工作室嘅場地

今日係平日冇活動，加上冇乜人，可以俾星星盡情跑，仲跑到塊面紅哂

媽咪最鐘意紅磚平房，懷舊得黎又有特色

牛棚藝術展係唔同時間會有唔同主題，所以去之前一定要 check 吓展覽時間呀！

－

牛棚藝術村

地址：九龍土瓜灣馬頭角道 63 號

開放時間：10am - 10pm

Forest Adventure - 大水坑

23m

Last visit on 2017.06.08

第三次帶星星去 Forest Adventure，佢真係好鐘意係呢條河度玩

有得掉石頭、坐木笩、捉魚仔，仲可以同其他小朋友一齊玩

一去到有少少雨，係室內玩住玩具等雨停，等雨停咗我地就落水玩

星星今日冇乜心情坐木笩，咁我地就去捉魚，仲捉到條魚毛仔

我地一齊將條魚 bb 擺入個桶度，之後放佢走，星星仲同條魚 say goodbye

最後玩咗兩個鐘，臨走前星星話想食麵，於是去村口間士多食埋下午茶

食飽飽一上車就訓著，今日放電大成功

－

HK Forest Adventures

地址：大水坑北街 12D（係大水坑村入面，由大水坑村停車場行五分鐘就到）

呢個 program 叫 PLAY852，適合 1.5 - 7 歲嘅小朋友

FunZone - 馬鞍山

22m29d

帶星星去馬鞍山 playhouse 玩，臨去玩之前食上海麵，胃口好好，食哂媽咪啲排骨

去到商場樓下見到有車車坐，即刻伸手問媽咪拎錢，一定要坐哂三架車車先罷休

入到去都算大，有好多野岩佢玩

其中有條黃色好長嘅滑梯太刺激，連媽咪都有啲驚

sir 到中間會飛起咗少少，星星你真係好大膽，玩完都笑得勁開心

星星去到好鐘意同啲大過佢嘅哥哥姐姐玩，人地去邊佢就跟到去邊

仲跟住啲哥哥姐姐跳彈床跳到超開心，玩咗成個下晝連佢都攰到話要走

香港濕地公園 - 天水圍

22m27d

之前買咗 annual pass 好耐都冇再去，見今日好好天就帶星星去玩

去到門口見到好多鴨仔同雀仔，星星睇得好開心，仲一支箭咁衝入去

星星好鐘意麥兜，睇個短劇場睇到入哂神

佢仲好鐘意禁啲沼澤嘅動物聲，呢個高度岩哂佢玩

黎到濕地公園一定要去呢個 playhouse 玩

雖然岩佢呢個歲數玩嘅野唔多，得一條滑梯，但星星次次都好鐘意玩

係呢度玩咗大半個鐘先捨得走

準備走果時無啦啦落大雨，好彩岩岩有架的士泊咗係度，如果唔係要行去搭輕鐵真係超呢 hea

－

濕地公園

地址：天水圍濕地公園路（天水圍西鐵站轉 705／706 輕鐵，濕地公園站）

開放時間：10am - 5pm（逢星期二休息）

D • Park - 荃灣

22m24d

朝早又落大雨，係屋企油顏色玩吓沙等雨停

媽咪畫咗星星最鐘意嘅巴斯同豬豬，又搵咗個盒俾佢玩沙

Kinetic sand 真係好好，唔怕整到周圍都係沙，好易清潔

等雨停咗之後我地就去 D • Park，帶星星去鯨魚花園玩，佢遠遠見到就好興奮嗌「Giraffe」

玩果時有哥哥同星星爭玩，媽咪教星星要叫哥哥排隊

佢即刻大叫「排隊」，嚇到其他小朋友都望住佢，星星你下次可唔可以溫柔啲呀？😅

係 Shoopen 買咗個背囊俾星星，dinosaur 公仔佢好鐘意，即刻要咩住行街

星星呢排都開始多咗自己行，希望遲啲可以唔洗帶 bb 車出街啦

EpicLand - 愉景灣

22m23d

上完 playgroup 後遠征入愉景灣，用咗個半鐘終於去到

我地係欣澳港鐵站轉 DB03P 巴士，平日每半個鐘一班車，車程大約二十分鐘

一去到要即刻依肚，跟住就出發去 playhouse 玩

星星係門口見到呢個叔叔指明話要同佢影相

EpicLand 超超超超大，平日去唔係太多人，呢度分咗好多個 area 俾唔同年紀嘅小朋友玩

under 3 歲有兩個 area 可以玩，有小型滑梯同波波池

星星由輕量級玩到重量級，有啲滑梯太斜媽咪都要抱住星星一齊 sir

黎到 Discovery Bay 成個人都 relax 哂，周圍嘅人都好悠閒

愉景灣仲有好多地方好靚嘅地方未去，下次一定要同埋星爸一齊黎

－

EpicLand

地址：愉景灣愉景北商場地下 G31（乘搭DB03P由欣澳港鐵站至愉景北商場總站）

Miffy 之拯救海洋｜中間道遊樂場 - 尖沙咀

22m22d

科學館逢星期三免費入場，宜家又有 Miffy 展覽，好岩小朋友去玩

我地大概 12pm 去到，唔洗排隊就有得入場

最底果層有巨型祿豐龍化石，恐龍迷星星企定定好認真咁觀察咗好耐

而另一邊有好多非洲草原嘅動物，星星以為佢地係真，係咁同佢地 say hello

一樓有個展覽廳關於職業安全健康，星星入到去見到啲假嘅地盤工人話「驚驚」😂

媽咪望下佢地個樣又幾恐怖喎，記得細個去科學館都見過果個博士，個樣十幾年不變

三樓兒童天地最岩星星，睇完 Miffy 再玩「圓球滾滾溜」玩到唔捨得走

我地係科學館大概玩咗兩個鐘，離開果陣已經見到出面要排長龍先入到

－

Miffy 之拯救海洋

地址：尖沙咀東學館道二號香港科學館三樓展覽廳

展覽日期：2017 年 4 月 7 日至 2017 年 10 月 11 日

見時間仲早，就順路去埋中間道遊樂場

係漆咸道南、梳士巴利道交界嘅港鐵尖東站平台上面（由科學館慢慢行過去大概十分鐘）

途中聽到有直升機飛過，星星勁興奮話俾媽咪知有飛機係上面

去到公園見到有個哥哥玩緊，佢即刻走埋去捉住人

兩個跑黎跑去，媽咪都冇哂氣追，由哥哥同佢好好放電

Forest Adventure - 大水坑

22m16d

之前嘅天氣麻麻地，隔咗一排冇黎，今日咁熱一定要落水玩

我地早咗去到大水坑，途經一間叫秘密花園嘅 cafe

好有田園 feel 嘅裝飾同一個「招待朋友」嘅牌就吸引咗我地入去

原來呢間 Secret Garden 係社企，所有食物都係以分享性質，所以係免費

如果支持佢地嘅理念，可以將自己嘅小小心意放係個箱入面

雖然只係一間細細地嘅 cafe，但食物都好有水準

我地叫咗個 set lunch，小食有醉雞、主菜有滷肉飯、甜品有 puff，仲有冰凍嘅薄荷水透心涼

所有員工都好 friendly，特別係老闆娘知道星星坐唔定，好細心俾 sofa 位我地等我地坐得舒服啲

而且 Secret Garden 定期會有唔同類型嘅 workshop 俾小朋友，下次可以帶星星一齊玩

食飽飽就出發去 Forest Adventures，一去到就玩玩具 warm up

星星未試過著 life jacket，初初都驚佢會抗拒，點知又肯乖乖地俾媽咪幫佢著

第一次坐木筏，媽咪係岸邊望住有少少擔心

不過 Uncle Danie 同 Auntie Diana 好識照顧小朋友，有愛心又有心機

星星熟習咗個環境後都放低介心，開始 enjoy 玩水

我地係條河度一齊搵石頭掉，星星係咁講「掉石頭」，仲玩得好開心

今次 book 咗呢個 forest adventure 係兩個小時，由 2pm 玩到 4pm

等星星再大啲就可以去 day camp 玩足一日

－

HK Forest Adventures

地址：大水坑北街 12D（係大水坑村入面，由大水坑村停車場行五分鐘就到）

呢個 program 叫 PLAY852，適合 1.5 - 7 歲嘅小朋友

Citygate Outlets｜文東路體育館 - 東涌

22m13d

星星陪媽咪去 Citygate Outlets 行街

其實最主要都係去 Polo 買衫俾星星，諗住遲下影入學相，要買返件四正啲嘅恤衫

除咗 Polo 之外，Burberry、I.T. 同 Shanghai Tang 都有童裝

Lunch 食 Pizza Express，係星星最鐘意食嘅 pizza

專登嗌咗個兒童餐，佢又真係食得哂，平時食媽咪煮啲野又唔見佢咁好胃口 😤

見星星咁乖陪媽咪 shopping，就帶佢去隔黎體育館嘅 playhouse 玩

平日又未到暑假嘅下晝唔係好多人，唔洗排隊就入到

呢個主題係航海歷險，中間有一大隻船，仲有一條有蓋嘅滑梯

可能星星仲細，佢次次見到有蓋嘅滑梯都唔敢 sir，一定要媽咪抱住先肯玩

好在搵到個大哥哥肯同星星玩，仲教佢打功夫

星星又好似聽得明哥哥講咩，會配合吓扮跌低，轉個頭又起身再打過 😂

－

東涌文東路體育館

地址：東涌文東路 39 號東涌巿政大樓二樓（係 Outlet 北面行五分鐘就到）

【大阪 7 天親子自駕遊】RINKU PREMIUM OUTLETS - Day 7

18m17d

行程：Rinku Premium Outlets－關西機場

黎到旅程嘅最後一日喇，輪到媽咪可以瘋狂 shopping 🛍（媽咪最期待嘅行程）

朝早有啲微微雨，令本來已經好凍嘅大阪更加凍

星星休息咗一晚後都好返啲，但都好驚佢又再凍親，唯有去個快閃 shopping 啦

Rinku Premium Outlets 離關西機場只有二十分鐘車程，可以俾媽咪最後衝刺

之前幾日係心齋橋附近都冇咩收獲，希望會係呢度買到心頭好啦！

Outlets 好大，其中 SEACLE 有西松屋同好多童裝賣，仲有兒童體驗主題樂園同摩天輪

但媽咪想買自己野多啲 ☺️所以就出發去 main building 喇～

由於時間有限，我地大多數都係地下果層

首先去 Beams 掃咗幾件衫俾星星，Beams 嘅童裝質地都幾好又唔係好貴

之後去 New Balance 買咗幾對鞋俾星星，啲款係香港未見過，出街唔怕同人撞鞋

再去 Ralph Lauren 買衫俾星星同星爸，天呀！又話買自己野，點知買極都係買俾佢地

經過 Bally 咁岩 on sale 又入去睇吓啦，睇岩咗對平底鞋又唔太貴，媽咪終於買到心水喇 😍

之後又去埋其他餔頭，收獲豐富滿載而歸，仲掛到成架 bb 車都係購物袋，太瘋狂

出完血就去機場喇，星星都凍到呆吓呆吓咁

－

Rinku Premium Outlets 

地址：〒598-8508 泉佐野市りんくう往来南 3-28

Map code：35 860 502*88

大阪 7 日自駕遊終於完滿結束，等星星大啲有機會再黎過玩啦！

今個 trip 俾星星見識咗飄雪，又近距離接觸奈良嘅鹿，希望佢大個都會記得啦 😝

【大阪 7 天親子自駕遊】EXPOCITY - Day 6

18m16d

行程：EXPOCITY－Imperial Hotel Osaka

星星起身就有啲流鼻水，可能係尋日太凍冷親

食咗少少藥又見佢好眼瞓咁，決定俾星星瞓多半日，補充吓體力

等星星瞓醒都下晝喇（應該係餓醒…）見佢精神都 ok 又冇發燒，咁繼續去玩啦～

我地下一個景點係去 EXPOCITY！

EXPOCITY 係一個超大型嘅綜合設施商場，除咗有 LaLaport EXPOCITY shopping mall 之外

仲有水族館 NIFREL、大自然體驗博物館 ORBI OSAKA、小型遊樂場 ANIPO、

摩天輪 REDHORSE OSAKA WHEEL、Pokémon EXPO GYM 等等

真係去一日都去唔哂，好羨慕日本有啲咁正嘅地方，小朋友同爸爸去玩，媽咪放心去 shopping

我地泊好車之後係 LaLaport EXPOCITY 搵野食，咁岩經過一間大型 supermarket

佢地啲熟食香嘖嘖，離遠都聞到，星爸就提議試下啦，因為實在太肚餓，我地都唔想再行喇

叫咗天婦羅、豬扒飯、炸薯餅、壽司，唔知係咪真係太餓，食咩都覺得好好味

天婦羅係超級脆卜卜，仲外脆內暖，而薯餅不嬲都係媽咪至愛，咖哩味無得頂呀 👍🏻

食飽我地就去 NIFREL 睇魚，星星聽到都開始興奮

一入到 NIFREL 比較黑，入面有好多好多好多個大大細細嘅魚缸，靚到「嘩」一聲

因為每個魚缸係燈嘅照射下，啲魚嘅顏色會好 sharp，好似見到好多唔同顏色嘅魚缸咁

媽咪覺得呢度嘅魚缸似藝術品多啲，星星一路行一路好認真睇魚，認真嘅男人真係好 charm

係 Wonder Moments 有個大水晶球係上面，將 17 種大自然嘅 Sense of Nature 投射係地面

配埋柔和嘅音樂，成個感覺好舒服，舒服到好似臨入房做 spa 咁 😌

星星同其他小朋友不停跑、不停踩地面嘅倒影，有人同佢放電真係爽！

跟住我地仲去咗睇白老虎、河馬、水豚、企鵝等等，一開頭仲以為 NIFREL 淨係得魚睇添

雖然係室內，但一啲都聞唔到動物嘅臭味，我地仲好好彩見到河馬 poo poo，真係好大堆 💩

玩完 NIFREL 我地經過 Pokémon EXPO GYM，呢排比卡超咁 hit 一定要入去睇吓

但原來星星太細未岩玩入面啲設施，我地唯有係出面精品店睇

星星見到比卡超都識講「 Bi 卡 Bi 卡」好搞笑 🤣

睇完比卡超媽咪拉咗星爸去坐 REDHORSE OSAKA WHEEL 摩天輪，一家人第一次一齊坐

世界第五高嘅摩天輪，係全日本最高嘅，每一卡嘅地板都係透明玻璃，可以睇到大阪嘅風景

摩天輪轉咗一個 round 之後，星星開始恰眼瞓，搖吓搖吓，好快就瞓著咗

我地見星星咁攰都費事嘈醒佢，一於返酒店叫 room service 啦！

－

EXPOCITY

地址：〒565-0826 吹田市千里万博公園 2-1

服務時間：10am - 9pm

Map code：1 799 254*56

【大阪 7 天親子自駕遊】奈良公園 - Day 5

18m15d

行程：奈良公園－奈良山－網元本館－Imperial Hotel Osaka

起身後渣咗個零鐘黎到奈良公園，今日真係勁凍，大概得 1 至 4 度

幫星星著咗 super warm 打底，厚身衛衣，背心褸，羽絨，兩條褲，仲痴埋暖包 🙈

去到奈良公園附近已經見到好多鹿周圍行，星星一落車都好興奮

我地買咗幾包鹿仙貝準備餵鹿，佢地好聰明會特登係賣鹿仙貝嘅門口等

到我地一出黎就成群鹿洶湧而上，圍住揸住鹿仙貝嘅星爸，嚇到佢即刻抱起星星

由於戶外真係太凍，我地去奈良国立博物館順便食少少野

星星食 spaghetti 媽咪就食 pancake，超好味呀！真係未食過咁好味嘅 pancake

食完就上返架車度，星爸周圍兜吓，意外地去咗奈良山

咁岩落緊飄雪，又有好多鹿係山上面，於是同星星落車睇吓啦

上到奈良山好少人，有幾間係卡通片度成日見到嘅舖頭仔，好有童年回憶

星星好開心，周圍跑周圍跳，仲好似一啲都唔驚凍 ❄️ 唔知佢大個會唔會記得第一次見到雪呢

－

奈良公園

地址：〒630-8212 奈良県奈良市春日野町 1-4

Map code：11 356 751*31

夜晚我地去食網元本館，上網睇有人話係蟹道樂嘅高級版，決定食豪少少試吓啦！

門口有個水池，養咗好多好多好多長腳蟹同埋松葉蟹，星星睇到唔願走添

網元本館有六層，入面仲有𨋢添，入面嘅裝修同格局都好有日式復古嘅味道

我地被安排係個包廂度，咁星星就算扭計都唔怕嘈到其他人

我地點咗個餐有八樣野食，星星有濕疹唔食得蟹，另外嗌咗個烏冬俾佢

前菜、清煮蟹腳、蟹肉刺身、燒蟹、蟹蓋蟹膏、蟹天婦羅、蟹肉涮涮鍋、蟹壽司拼盤同水果

媽咪最鐘意食蟹蓋蟹膏，一啖蟹腳，一啖蟹膏，係個口入面慢慢溶化 😋

天婦羅皮薄但脆卜卜，仲食到蟹腳嘅鮮味

去到壽司媽咪都已經好飽喇，未試過淨係食蟹都食到咁飽

但今餐真係好滿足，連星爸都話冇介紹錯！

－

網元本館

地址：〒542-0086 大阪市中央区西心斎橋 2-13-15 

Map code：1 315 002*25