18m17d
行程：Rinku Premium Outlets－關西機場
黎到旅程嘅最後一日喇，輪到媽咪可以瘋狂 shopping 🛍（媽咪最期待嘅行程）
朝早有啲微微雨，令本來已經好凍嘅大阪更加凍
星星休息咗一晚後都好返啲，但都好驚佢又再凍親，唯有去個快閃 shopping 啦
Rinku Premium Outlets 離關西機場只有二十分鐘車程，可以俾媽咪最後衝刺
之前幾日係心齋橋附近都冇咩收獲，希望會係呢度買到心頭好啦！
Outlets 好大，其中 SEACLE 有西松屋同好多童裝賣，仲有兒童體驗主題樂園同摩天輪
但媽咪想買自己野多啲 ☺️所以就出發去 main building 喇～
由於時間有限，我地大多數都係地下果層
首先去 Beams 掃咗幾件衫俾星星，Beams 嘅童裝質地都幾好又唔係好貴
之後去 New Balance 買咗幾對鞋俾星星，啲款係香港未見過，出街唔怕同人撞鞋
再去 Ralph Lauren 買衫俾星星同星爸，天呀！又話買自己野，點知買極都係買俾佢地
經過 Bally 咁岩 on sale 又入去睇吓啦，睇岩咗對平底鞋又唔太貴，媽咪終於買到心水喇 😍
之後又去埋其他餔頭，收獲豐富滿載而歸，仲掛到成架 bb 車都係購物袋，太瘋狂
出完血就去機場喇，星星都凍到呆吓呆吓咁
－
Rinku Premium Outlets
地址：〒598-8508 泉佐野市りんくう往来南 3-28
Map code：35 860 502*88
大阪 7 日自駕遊終於完滿結束，等星星大啲有機會再黎過玩啦！
今個 trip 俾星星見識咗飄雪，又近距離接觸奈良嘅鹿，希望佢大個都會記得啦 😝
18m16d
行程：EXPOCITY－Imperial Hotel Osaka
星星起身就有啲流鼻水，可能係尋日太凍冷親
食咗少少藥又見佢好眼瞓咁，決定俾星星瞓多半日，補充吓體力
等星星瞓醒都下晝喇（應該係餓醒…）見佢精神都 ok 又冇發燒，咁繼續去玩啦～
我地下一個景點係去 EXPOCITY！
EXPOCITY 係一個超大型嘅綜合設施商場，除咗有 LaLaport EXPOCITY shopping mall 之外
仲有水族館 NIFREL、大自然體驗博物館 ORBI OSAKA、小型遊樂場 ANIPO、
摩天輪 REDHORSE OSAKA WHEEL、Pokémon EXPO GYM 等等
真係去一日都去唔哂，好羨慕日本有啲咁正嘅地方，小朋友同爸爸去玩，媽咪放心去 shopping
我地泊好車之後係 LaLaport EXPOCITY 搵野食，咁岩經過一間大型 supermarket
佢地啲熟食香嘖嘖，離遠都聞到，星爸就提議試下啦，因為實在太肚餓，我地都唔想再行喇
叫咗天婦羅、豬扒飯、炸薯餅、壽司，唔知係咪真係太餓，食咩都覺得好好味
天婦羅係超級脆卜卜，仲外脆內暖，而薯餅不嬲都係媽咪至愛，咖哩味無得頂呀 👍🏻
食飽我地就去 NIFREL 睇魚，星星聽到都開始興奮
一入到 NIFREL 比較黑，入面有好多好多好多個大大細細嘅魚缸，靚到「嘩」一聲
因為每個魚缸係燈嘅照射下，啲魚嘅顏色會好 sharp，好似見到好多唔同顏色嘅魚缸咁
媽咪覺得呢度嘅魚缸似藝術品多啲，星星一路行一路好認真睇魚，認真嘅男人真係好 charm
係 Wonder Moments 有個大水晶球係上面，將 17 種大自然嘅 Sense of Nature 投射係地面
配埋柔和嘅音樂，成個感覺好舒服，舒服到好似臨入房做 spa 咁 😌
星星同其他小朋友不停跑、不停踩地面嘅倒影，有人同佢放電真係爽！
跟住我地仲去咗睇白老虎、河馬、水豚、企鵝等等，一開頭仲以為 NIFREL 淨係得魚睇添
雖然係室內，但一啲都聞唔到動物嘅臭味，我地仲好好彩見到河馬 poo poo，真係好大堆 💩
玩完 NIFREL 我地經過 Pokémon EXPO GYM，呢排比卡超咁 hit 一定要入去睇吓
但原來星星太細未岩玩入面啲設施，我地唯有係出面精品店睇
星星見到比卡超都識講「 Bi 卡 Bi 卡」好搞笑 🤣
睇完比卡超媽咪拉咗星爸去坐 REDHORSE OSAKA WHEEL 摩天輪，一家人第一次一齊坐
世界第五高嘅摩天輪，係全日本最高嘅，每一卡嘅地板都係透明玻璃，可以睇到大阪嘅風景
摩天輪轉咗一個 round 之後，星星開始恰眼瞓，搖吓搖吓，好快就瞓著咗
我地見星星咁攰都費事嘈醒佢，一於返酒店叫 room service 啦！
－
EXPOCITY
地址：〒565-0826 吹田市千里万博公園 2-1
服務時間：10am - 9pm
Map code：1 799 254*56
18m15d
行程：奈良公園－奈良山－網元本館－Imperial Hotel Osaka
起身後渣咗個零鐘黎到奈良公園，今日真係勁凍，大概得 1 至 4 度
幫星星著咗 super warm 打底，厚身衛衣，背心褸，羽絨，兩條褲，仲痴埋暖包 🙈
去到奈良公園附近已經見到好多鹿周圍行，星星一落車都好興奮
我地買咗幾包鹿仙貝準備餵鹿，佢地好聰明會特登係賣鹿仙貝嘅門口等
到我地一出黎就成群鹿洶湧而上，圍住揸住鹿仙貝嘅星爸，嚇到佢即刻抱起星星
由於戶外真係太凍，我地去奈良国立博物館順便食少少野
星星食 spaghetti 媽咪就食 pancake，超好味呀！真係未食過咁好味嘅 pancake
食完就上返架車度，星爸周圍兜吓，意外地去咗奈良山
咁岩落緊飄雪，又有好多鹿係山上面，於是同星星落車睇吓啦
上到奈良山好少人，有幾間係卡通片度成日見到嘅舖頭仔，好有童年回憶
星星好開心，周圍跑周圍跳，仲好似一啲都唔驚凍 ❄️ 唔知佢大個會唔會記得第一次見到雪呢
－
奈良公園
地址：〒630-8212 奈良県奈良市春日野町 1-4
Map code：11 356 751*31
夜晚我地去食網元本館，上網睇有人話係蟹道樂嘅高級版，決定食豪少少試吓啦！
門口有個水池，養咗好多好多好多長腳蟹同埋松葉蟹，星星睇到唔願走添
網元本館有六層，入面仲有𨋢添，入面嘅裝修同格局都好有日式復古嘅味道
我地被安排係個包廂度，咁星星就算扭計都唔怕嘈到其他人
我地點咗個餐有八樣野食，星星有濕疹唔食得蟹，另外嗌咗個烏冬俾佢
前菜、清煮蟹腳、蟹肉刺身、燒蟹、蟹蓋蟹膏、蟹天婦羅、蟹肉涮涮鍋、蟹壽司拼盤同水果
媽咪最鐘意食蟹蓋蟹膏，一啖蟹腳，一啖蟹膏，係個口入面慢慢溶化 😋
天婦羅皮薄但脆卜卜，仲食到蟹腳嘅鮮味
去到壽司媽咪都已經好飽喇，未試過淨係食蟹都食到咁飽
但今餐真係好滿足，連星爸都話冇介紹錯！
－
網元本館
地址：〒542-0086 大阪市中央区西心斎橋 2-13-15
Map code：1 315 002*25
18m14d
行程：LEGOLAND－海遊館－釣船茶屋－Imperial Hotel Osaka
渣車去到天保山購物中心，好求其咁係果度嘅 food court 食 lunch
但天婦羅烏冬出奇地好味，真係向香港食唔到！
食飽就出發去 LEGOLAND 玩喇，係呢個購物中心嘅三樓
一入去 LEGOLAND 可以睇一場 factory tour，睇完就可以入去玩喇
入面有兩款比較大型嘅機動遊戲，可以親子一齊玩，星星太細要等佢大啲先玩到
又有一個 play zone，有高度限制（90cm - 150cm）星星又唔夠高玩 😣
咁我地再行入啲有個 Ninja training camp，其中有個遊戲係要避開啲 laser
星爸玩得好開心，仲玩完一次又一次，媽咪不嬲手腳唔協調，次次都失敗 😢
LEGOLAND 仲有 4D 戲院、MINILAND（由好多 LEGO 砌成嘅小小世界）同自己砌賽車比賽
而星星就只可以係 DUPLO farm 度玩，有條細滑梯俾佢玩，仲有無限 LEGO 可以砌
隔黎有 Olivia's House 可以煮飯仔，岩哂星星玩
不過 LEGOLAND 比想像中細好多，等星星再大啲可以帶佢去其他 LEGOLAND 再玩過！
－
LEGOLAND® Discovery Center
地址：〒552-0022 大阪市港区海岸通 1-1-10 天保山マーケットプレース 3F
開放時間：10am - 8pm，最遲入場 6pm
Map code：1 246 297*48
溫馨提示：一定一定一定要有小朋友（15歲以下）陪伴先可以入場，大人係唔可以單獨入去！
－
玩完 LEGOLAND 我地就出發去海遊館，海遊館正正就係 LEGOLAND 隔黎
海遊館係世界最大嘅水族館之一，而且仲有八層咁高
一入去會經過一條好短嘅海底隧道，昂高頭都見到有魚經過，星星見到即刻要騎膊馬近啲睇
跟住指示行會見到水瀨、海獅海豹、長鼻浣熊、國王企鵝同海豚
然後去到太平洋展示區就見到巨型鯨鯊，星星都睇到目定口呆！
行到尾仲有體驗水族箱，洗完手後可以摸魔鬼魚，感覺滑嘟嘟咁～～
－
Osaka Aquarium KAIYUKAN 海遊館
地址：〒552-0022 大阪市港区海岸通 1-1-10
開放時間：10am - 8pm（最遲入館時間為閉館前一小時）
Map code：1 246 174*87
夜晚我地就去咗釣船茶屋食飯，可以一邊釣魚一邊食飯，餐廳中間有隻大船，我地坐係船嘅側邊
職員好快俾咗兩支魚杆我地，又問我地洗唔洗買魚餌，同提醒釣到嘅魚係唔可以唔要
我地釣咗大半個鐘都冇收穫，唯有嗌野食依包個肚先
嗌咗刺身、天婦羅同燒魚，味道就一般啦，相信係日本應該會食到更好味嘅日本菜
星星都好落力釣魚，不過佢似玩水多啲 😓 其間不斷聽到有職員打鼓，表示有人釣到魚
好羨慕呀～～～～！食到差唔多飽，星爸抱咗星星出去睇魚
媽咪冇野做就去釣吓魚碰吓運氣，點知…天呀！我！竟！然！釣！到！魚！
有人即刻打鼓話釣到魚，星爸趕到黎都呆咗，因為我地真係好飽飽飽飽飽飽！
職員問我地想點樣整條魚食，我地嗌咗個刺身，食完真係飽到上心口
媽咪覺得釣船茶屋好玩唔太好味，如果有小朋友帶佢地黎釣魚，都幾好玩呀
－
釣船茶屋
地址：〒542-0073 大阪市中央区日本橋 1-1-13 難波ワシントンホテルプラザ B1F
營業時間：平日 5pm - 12am｜六、日 11:30am - 11:30pm
Map code：1 286 723*53
18m13d
行程：Kids Plaza Osaka－燒肉一丁 心齋橋店－Imperial Hotel Osaka
第三日發生咗小小咗小小意外，我地架車就咁泊咗係街，俾人抄牌
朝早去咗警局俾錢，搞咗成朝先搞掂，本身 plan 咗去市立王子動物園都要 cancel
lunch 去黑門市場外面嘅燒肉店食，係用傳統炭火爐自己燒黎食
侍應哥哥推介呢度嘅雞似好出面，於是嗌咗雞肉同、雞軟骨同雞皮
星爸燒得好好味呀，啲皮燒到好脆，雞肉又好 juicy 😋
食飽就出發去 Kids Plaza Osaka，係兒童博物館
星星未夠兩歲都有好多野岩玩，由三樓玩到五樓
三樓係創造樓層，有創作室、電腦室同數字體感廣場 Aqua，小朋友可以發揮創意 DIY
四樓係冒險樓層，有 Peek-A-Boo室，有軟墊同玩具俾 bb 玩，同埋有小型圖書館
五樓係發現樓層，有 DIY 手作體驗區、泡泡區、測跑步速度嘅儀器同 TV Studio
而最吸引嘅係四樓至五樓兒童城堡，城堡入面有好多樓梯同滑梯俾小朋友穿梭呢兩層
星星最鐘意玩吊橋，星爸跟住星星周圍行，轉個頭已經唔見咗佢地
而最岩星星玩嘅係五樓，單係世界各地嘅樂器已經玩到唔捨得走
另一邊仲可以自己拉巨型泡泡，星星第一次俾咁大個泡泡包住都好新奇
係度玩咗成個下晝都肚餓，就去燒肉一丁心齋橋店食晚餐
用木炭同瓦斯爐去烤肉，體驗極上黑毛和牛燒肉！
食飽飽行咗陣心齋橋，星星凍到個鼻都紅哂，媽咪唯有行少陣街返酒店啦
－
大阪兒童樂園 Kids Plaza Osaka
地址：〒530-0025 大阪市北区扇町 2-1-7
休館日：每月第二個，第三個星期一
Map code：1 436 167*33
18m12d
行程：神戶動物王國－UMIE 臨港城店－炭焼肉 石田屋 本店－The B Kobe 酒店
第二日出發去神戶動物王國，距離酒店都係二十分鐘車程
動物園有室內同戶外兩部份
室內有水豚、海豹、樹懶、小貓熊、環尾狐猴、貓頭鷹
戶外有羊駝、袋鼠、梅花鹿、駱駝、小綿羊、鴨仔
我地係室內餵水豚，其實都幾大隻，媽咪都驚驚地，星星反而好鐘意佢地 😅
餵完就出戶外餵鴨仔，一出去真係有啲凍，即刻幫星星著返羽絨
係戶外大概 stay 咗半個鐘又入返室內餵兔仔，來來回回睇咗幾次睇唔同嘅動物，驚凍親星星
值得提嘅係果度嘅花森林餐廳佈置得好靚，可以係花海食飯好 relax
－
神戸どうぶつ王国
地址：〒650-0047 神戸市中央区港島南町 7-1-9
開園時間：平日 10am - 5pm｜假日10am - 5:30pm
Map code：12 252 062*73
夜晚去食炭焼肉石田屋食燒肉，用香港好少有嘅炭爐燒出黎嘅A5 黑毛和牛，星爸燒得好 juicy
媽咪最鐘意食鹽燒牛舌，好有咬口
不嬲唔鐘意食飯嘅星星都食咗好大碗飯，牛肉汁送飯好好味呀 😋
我地都係用 Tripla 呢個 app book 位，book 好後會有專人聯絡返你，好方便！
－
炭焼肉 石田屋 本店
地址：〒650-0012 兵庫県神戸市中央区北長狭通 1 丁目 20-9
Map code：12 368 853*04
18m11d
行程：關西機場－Mouriya 本店－The B Kobe 酒店
媽咪真係超大頭蝦呀，plan 去大阪時完全唔知果度會落雪 😧
到買哂機票 book 哂酒店先知會咁凍（星爸都俾媽咪吹漲…）
出發前超擔心星星會凍親，帶咗好多保暖衫俾佢，又帶定啲藥傍身，好在兩個喼都夠裝
星星第二次去日本，初七出發，兩大一小嘅機票要九千蚊（最衰星爸請唔到假…要捱貴妃）
去到關西機場已經係下晝四點幾，攞埋車就出發去神戶，車程大概一個鐘
日本嘅凍冇媽咪想像中咁凍，係室內同車入面都好暖
星星係室內都係著一件 super warm 加厚身衫，出室外就要加羽絨同帶帽
夜晚去 Mouriya 本店食神戶燒肉，呢間店有百幾年歷史，連林志玲都推薦，一定要試吓
星爸負責燒，媽咪就睇住星星唔俾佢搞搞震，神戶牛好 juicy 好有牛味，星星都食咗幾舊
食完就去酒店 check-in，好好休息叉足電，準備第二日去玩喇～
－
神戶 モーリヤ (mouriya) 本店
地址：〒650-0011 神戸市中央区下山手通 2-1-17
營業時間：11am - 10pm
Map code：12 368 698*53
