2y3m
星星放學後帶佢去剪頭髮，準備下星期要 interview 執整齊啲個頭
佢兩歲時去過 PRIVATE i 嘅利園分店，剪得幾好，可惜太遠喇唔係咁方便
今次試吓又一城呢間，近星星放學又就腳
PRIVATE i 隔黎有反斗城，買咗星星呢排最鐘意嘅忍者 figure 俾佢定驚
上次眼瞓唔肯自己坐，希望今次唔洗媽咪成程抱住啦～
Salon 入面有好多隻豬仔俾小朋友坐住剪頭髮，又有個 mon 俾佢地睇電視
星星揀好豬仔後坐上去，有個姐姐俾咗好多隻 DVD 星星揀
見佢十五十六咁，媽咪幫星星揸主意睇 McQueen 啦
今次星星出奇地超合作，好專心睇戲，媽咪坐係後面等，十五分鐘就剪好個頭喇
髮型師話星星坐得咁定，提議佢可以沖吓個頭
媽咪初時都有啲擔心，點知星星又 ok，乖乖地瞓好俾哥哥洗頭，實在太好喇！
洗完再吹埋個頭靚仔哂，星星頭頂有兩個轉痴埋，髮型師仲教我有咩髮型岩佢，好細心
呢次剪髮盛惠 $350，星星表現得咁好，下次可以同媽咪一齊剪喇！
－
PRIVATE i GARDEN Kids Salon
地址：九龍塘達之路 80 號又一城 L2-55 號舖
2y3m
終於到咗秋天喇，一定要去親親大自然
第一次黎 448 農莊，對於住元朗嘅我地好方便，車程都只係十五分鐘
入場費五十蚊，小朋友未夠三歲就免費
星星一去到見到隻熊貓，仲好肉緊咁攬住佢
行入啲見到有小賣部，有得買小食、飲品同小玩具
買咗個吹波波同竹蜻蜓俾星星，玩咗幾吓就唔玩，鐘意係大草地周圍走
星星見到有個電話亭，係咁開門閂門扮打電話 😆
草地隔黎有架紅色雙層巴士，好懷舊，好似細個成日搭嘅熱狗巴士
玩完一輪去木長凳差電，媽咪買咗燒賣，星星仲不停話「燒賣好好味 😋」
行入啲有兔仔、魚同雀仔睇，又有個小型遊樂場玩，都可以消磨成個下晝
星期六日會有充氣彈彈床、兒童電動車、樹木繩索等等，一家大細可以玩成日
玩到最尾咁岩有得餵羊咩咩食麵包，餵餵吓有幾隻羊仔跳咗出欄嚇親星星
其實媽咪見到佢地咁熱情都嚇親，唯有頂硬上，抱起星星一齊餵 😂
－
448 農莊
地址：元朗欖口村欖堤東路
開放時間：9:30am - 5:30pm
2y2m
UPDATE: AM Offer
星星今年嘅第一個 K1 interview，當俾我地去 warm up 吓，熟習吓 interview 嘅 rundown
9:30am interview，我地 9am 就到咗喇，學校門口已經有條長龍
入到學校係 playground 度一路玩一路等，星星不斷玩滑梯又爬高爬低，好 hyper
玩咗大概三十分鐘就入去 waiting room，原來係 n 班同 K1 一齊 interview
我地去咗音樂室，有二十個小朋友圍圈，三個 net 係度唱歌跳舞，後面都有兩個老師全程 mark 分
唱完 4－5 首歌之後就轉去閱讀室，可以自由睇書
等咗一陣聽到叫名就入課室一對一 interview
老師問星星叫咩名呀？幾多歲呀？今日邊個帶你黎呀？好在星星都肯開口講野
之後就拎咗幾樣玩具考小手肌，問咗佢少少顏色，都答得幾好
到問家長問題，都係問平時多數去邊度玩呀？屋企用咩語言溝通呀？
老師話星星都幾淡定 😌（其實係佢慢熱得太緊要...）
成個過程大概十分鐘，老師最後送咗一袋野俾星星，跟住就走得
星星算做得幾好喇，起碼肯同陌生人講吓野，如果講野再大聲啲就更好啦！
2y2m
今日要去買生日禮物送俾星星爺爺，去 Elements 行街順便帶星星去呢個遊樂場玩
係 ThreeSixty 對出搭 lift 去到 PR 層，行過一條小路就見到喇
個遊樂場好大同好多野玩，有搖搖車、企係度玩嘅搖搖板、平衡木同幾條滑梯
仲分好哂一個個 area 俾唔同年紀嘅小朋友玩
其中有個氹氹轉最吸引到星星，雖然佢隻腳唔夠長踩唔到，好在有個哥哥幫手搏命踩
搭吓順風車都好滿足 😊
呢度靜靜地唔太多人，下次黎開 Elements 都要再黎玩呀！
2y2m
Book 咗幾次黎 T · PARK 都出咗啲意外黎唔到，今日終於成功去到喇
今次淨係報名 join 咗個導賞團，呢度仲有個 spa 可以浸吓，但星星有濕疹就唔放心俾佢浸
去到 T · PARK 聞到有少少嘅垃圾臭味，入咗室內就冇味，俾我想像中好
睇咗一段片講關於呢個 T · PARK 嘅由來同威水野
媽咪一路睇一路擔心星星會唔會睇得明 （兩歲小朋友連污泥係咩都唔知...又點會明丫）😓
好在星星都肯坐定定睇哂成個 video
之後導賞員就帶我地出發去參觀唔同嘅展覽區，俾我地了解 T · PARK 點樣處理污泥同運作
星星行咗十分鐘，終於忍唔住開 turbo 周圍跑，媽咪唯有帶佢去 cafe 度食少少野
Cafe 嘅所有枱凳都係用舊灣仔碼頭嘅防撞木所製成，好有特色，星爸見到一定好鐘意
嗌咗個磨菇意粉同星星 share，自己係雪櫃拎再叮返熱，都幾好味
係呢度食完要自己洗返乾淨啲食具，非常環保
望住出面嘅大海食野好舒服，但湊住呢隻百厭星都 relax 唔到
帶佢去二樓嘅戶外花園影吓相，俾佢跑吓放吓電
男仔真係冇時停，一見到地方大少少就會不停跑（究竟你係咪倉鼠...）
岩岩好睇埋日落，可惜媽咪部相機冇哂電，冇得幫星星影多啲靚相
－
T · PARK [源· 區]
地址：屯門曾咀稔灣路 25 號
開放時間：星期一、星期三至日 10am - 7pm
交通：有穿梭巴士係港鐵屯門站公共運輸交匯處（V City 地下嘅旅遊巴士停車處）
＊預約時要 book 埋穿梭巴士嘅上落車時間，自己渣車去都要 book 埋停車場泊車位
＊如果小朋友太細唔建議 book 導賞團，淨係係出面戶外影相嘅話只要網上 book 交通就得
2y2m
今年同上年嘅主辦單位唔係同一間公司（應該唔會無啦啦結業…）但玩嘅野都差唔多
有冰館、遙控車樂園、無人穿越機樂園、小型越野四驅車、角色扮演拍攝區同充氣樂園
大棠有機生態園果邊有馬車、駝鳥、刺豬、白兔仔，仲可以俾小朋友餵馬、羊咩咩同錦鯉
經過上年黎冰館嘅經驗，入面真係好好好好好凍，差唔多有零下十度
主辦單位提供嘅小朋友羽絨未必夠保暖，帶埋星星件私家羽絨就最穩陣
平日去到冇咩人，成個冰館得我地兩母子，唔洗同人逼 😅
冰館入面有冰滑梯、冰極火車頭、冰砌糖果屋、冰雕火箭、冰砌熱氣球同聖誕老人雪橇等等
媽咪抱住星星 sir 滑梯，由於媽咪太重所以 sir 得好快，好彩星星都玩得好開心
入咗冰館十五分鐘，星星隻手已經凍到佢嗌唔舒服，拿拿聲影埋啲相就走人
－
海陸空冰雪嘉年華 2017
地址：大棠有機生態園
開放日子：2017 年 9 月 29 日至 2018 年 2 月 25 日
開放時間：星期一至四 12pm - 6pm｜星期五、六、日及公眾假期 10am - 6pm
跟住行去有機生態園，咁岩啲馬出黎散步，俾星星睇咗陣，仲睇到好入神添
再行入去動物村餵羊咩咩食紅蘿蔔，啲羊都幾惡架
特別係條頸有噹噹果啲，會用個頭撞開側邊啲細羊爭野食
所以星星都好小心翼翼咁餵佢地，驚俾啲羊咬到，仲話「羊咩咩曳曳 push baby」😅
之後去咗餵魚，星星最鐘意，一掉啲魚糧落去即刻有好多錦鯉游上水
玩多陣去埋小食亭食雪條就返屋企喇
－
大棠有機生態園
地址：元朗大棠山道十一號
開放時間：9am - 6pm
2y2m
見到細細星呢個名就即刻諗起星星 😝決定帶佢同星爸去睇
由一路青空 x Trickstation 主辦，係一個關於迷路嘅溫馨親子故事
故事講述細路女 Starry 嘅爸爸唔見咗，於是 Starry 同狗狗 Lulu 拎住爸爸嘅舊衫
跟住爸爸嘅味道，走過一個又一個奇幻星球，踏上一場歷險之旅
星星太細未睇得明個內容，淨係知道姐姐個爸爸唔見咗
反而星星好鐘意睇 Trickstation 嘅哥哥跳舞，見到佢地可以彈黎彈去好驚訝
呢個節目仲會教小朋友點樣睇星星，咩星星係咩位會係邊個星座
等星星大啲可以去露營睇星星呀！⭐️
－
細細星 Starry
節目地點：沙田大會堂文娛廳
節目日期：2017 年 9 月 29 至 30 日及 10 月 6 至 7 日 19:45 ; 2017 年 10 月 2 日及 7 日 14:45 ; 2017 年 10 月 1 日及 8 日 11:30＆16:00
節目長度：兩小時
