「開懷集」系列：白色世界 - 葵青劇院黑盒劇場

2y5m

冬天第一時間會諗起好凍落雪 ❄️帶星星去感受吓冬天嘅白色世界究竟係點

星星今次係第二次去葵青劇院，一去到竟然講「Yellow Submarine」真係超好記性！

因為上次黎係去睇 B 頭四，到宜家佢仲好鐘意聽 Yellow Submarine

隔咗四個幾月黎返呢度，佢都仲記得，媽咪真係好 surprise 🤩

小朋友可以揀坐舞台前嘅矮凳仔，但家長就唔可以坐隔黎，星星唔制一定要痴住媽咪

好啦 😌咁媽咪就攬住星星坐後排，大啲先自己一個坐前面啦

《白色世界》係一部展現冬季唔同面貌嘅感官舞劇

表演者透過舞蹈、戲劇、現場音樂同舞台設計，帶領小朋友用心去感受進行探索之旅

而每場演出之後，表演者都會教大家學跳「冬日之舞」

星星睇得好開心，有跟住一齊學跳舞，完場後仲可以同表演者影相添！

－

「開懷集」系列：黑天使舞蹈劇場(荷蘭)《白色世界》

地點：葵青劇院黑盒劇場／大埔文娛中心黑盒劇場

節目日期：2017 年 12 月 29 至 2018 年 1 月 1 日

節目長度：四十分鐘

河背水塘家樂徑 - 元朗

2y5m

同星星第二次行山，諗住揀啲比較易行嘅家樂徑（但…中伏了 😖）

星爸揸車去到錦上路西鐵站，泊好車後搭 71 號綠 van 去到河背村總站落

係河背村入口向前行，穿過條村轉左就開始行上山

其實呢條上山路唔太斜，不過好長好長，星星都好乖肯行，沿住山邊嘅芒草一路向上行

行咗大概二十分鐘去到河背露營場，有人係度紮營同 BBQ

露營場左手邊係去雷公田，有條小溪澗，有兩隻狗狗係度游水

望落去啲水好清好乾淨，星星好想落去玩水，但我地仲要趕係太陽落山前去到河背水塘呀！

露營場右手邊有條更長更斜嘅上山路，我地就係要行呢條路先上到河背水塘家樂徑 😩

媽咪望住條一望無盡嘅長命斜都心感不妙，星星行咗咁耐開始攰要抱

我地係咁鼓勵星星繼續行，佢每行一段路就俾佢飲一啖果汁獎勵佢

途中會經過青協有機農莊，俾入場費就可以參觀農田，仲可以買有機菜添

再行多二十分鐘，終於見到河背水塘家樂徑個牌喇，好～攰～呀！

星星終於頂唔順要星爸抱，其實星星都好犀利 👍🏻人仔細細都可以行到大半個鐘斜路

河背水塘家樂徑其實係一個大圈圍住河背水塘，算好易行，條路夠闊夠平坦，得少少樓梯級

大人行大概四十五分鐘，如果同埋星星一齊行就要一個鐘

星爸抱住星星沿住家樂徑一路行，一路問佢自己落地行得唔得呀，但都俾星星拒絕 😝

行到一半有條長木凳可以望到水塘嘅景色，我地坐低休息咗陣，星星又好似差滿電無啦啦跳舞

抖咗一陣又要出發喇，星星繼續要星爸抱，仲好嗲咁僕係爸爸度嗌「爸爸加油」

媽咪真係要唱返句「如孩兒能伏於爸爸的肩膊，誰要下車」辛苦哂星爸喇！

沿途經過小橋、溪澗，流水、竹林，遠離繁囂，俾星星靜靜地親親大自然

真係足足行咗一個鐘，終於去到水塘喇！呀仔，我地做到喇，終於去到終點喇！😭好感動

岩岩好趕得切見到太陽落山，個夕陽真係好靚呀

水塘中間有個小島，側邊仲有個好宏偉嘅 S 型水壩，係河背水塘嘅 signature

咁辛苦行到上黎係值得架！世外桃園嘅河背水塘，景色真係一流 👍🏻

－

河背水塘家樂徑

交通：錦上路西鐵站搭 71 號綠色小巴到河背總站

大棠有機生態園｜海陸空冰雪嘉年華 - 元朗

2y5m

Last visit on 2017.10.16

聖誕節朝早趁星爸未起身，同星星快閃去多次大棠嘅海陸空冰雪嘉年華

我地先去有機生態園，係馬房睇 🐴星星話鐘意 brown color 嘅馬馬多過 white color

要夠三歲先可以騎馬，星星等多半年就得喇！

之後去兒童遊樂場玩 sir 滑梯，朝早黎到冇人，星星可以盡情喪跑

仲走去執啲沙沙石石玩，星星以為係沙灘果啲沙，係咁掉黎掉去，好～污～糟～架！

好唔容易拉走星星離開兒童遊樂場，行入啲去動物村搵羊咩咩

一去到見到有孔雀開屏，仲要係白色嘅孔雀，媽咪都係第一次見

星星今次終於認到佢地係 peacock，又指住隻野豬叫 headchog 😅又真係幾似樣嘅

用一格飛買咗杯紅蘿蔔，星星初頭有啲驚要坐係 bb 車唔肯落地

（上次星星餵餵吓羊突然間有幾隻衝出欄，嚇到佢即時要媽咪抱，自此就驚咗啲羊）

媽咪 check 咗好多次 make sure 啲欄全部鎖住，星星終於放低介心肯落地

太好喇，媽咪好欣賞星星可以克服到自己驚嘅野，肯嘗試踏出第一步

呢樣野媽咪真係要好好向星星學習（媽咪有太多野驚，踏極都踏唔到出去…）

餵完羊咩咩再去買多兩袋魚糧出返去荷花池餵魚

點知媽咪睇漏一眼，星星就倒哂成包魚糧落去 😮😮😮媽咪只能夠 O 咀

啲魚今日冇乜胃口，竟然淨係得幾條魚游過黎食，平時一定成群衝上水面爭食

－

大棠有機生態園

地址：元朗大棠山道十一號

開放時間：9am - 6pm

趁星星仲有少少電，我地就快啲去埋隔黎嘅海陸空冰雪嘉年華

一去到玩冰館先，媽咪今次都有幫星星自備私家羽絨，唔怕唔夠暖

星星仍然最鐘意喱埋係冰屋入面，始終係香港好少有真嘅冰屋睇

不過星星不停嗌隻手好凍，係冰館留咗十分鐘就頂唔順要走人，睇黎下次要帶埋手襪先得！

冰館出面仲有遙控車樂園、無人穿越機樂園、小型越野四驅車、角色扮演拍攝區同充氣樂園

本身諗住同星星玩佢最鐘意嘅吹氣彈床，點知佢話好眼瞓要瞓覺 💤

好啦～咁下次再黎玩過啦（橫掂住得咁近，實有機會再黎過）

－

海陸空冰雪嘉年華 2017

地址：大棠有機生態園

開放日子：2017 年 9 月 29 日至 2018 年 2 月 25 日

開放時間：星期一至四 12pm - 6pm｜星期五、六、日及公眾假期 10am - 6pm

AIA 歐陸嘉年華 - 中環

2y5m

平安夜一家人去 AIA 歐陸嘉年華，上年得媽咪同星星去，今年第一次一家三口一齊去

成人票＄130（包十個代幣）星星未夠三歲唔洗買飛

去到門口影相打卡，星星岩岩瞓醒心情好好，希望佢唔好咁快冇電啦

下晝一點入場，好多遊戲都唔洗點排隊，但好猛 ☀️熱到星星出哂汗

一入場左手邊見到「駕駛學校 Kid's Driving School」有得揸 TESLA，星星雙眼發光話要揸車車

星星揸住 TESLA 兜咗好多個圈，星爸仲讚星星過彎識走線位 😂

揸完車就去揸直升機揸飛機，直升機可以同星爸一齊玩

但「Mini Planes」飛機個位太細，星星要自己一個玩，飛機會慢慢飛上半空又降落

Toy Story 忠實 fans 嘅星星指明一定要坐返 Toy Story 嘅公仔

星星經過巨型滑梯俾佢吸咗去，即刻排隊玩，呢個重任要交俾星爸，抱住星星爬上去

真係超高呀！大人玩都驚，媽咪係下面望住佢地都膽顫心驚

星星玩完一次又一次，完全唔驚，媽咪都服咗佢 🤦🏻‍♀️

玩完一輪去睇「The Great Circus of Europe 雜技團」

一早上 HK Ticketing 買咗飛（ AIA 入面唔可以拎飛，要去通利或其他售票處攞咗飛先）

個場地比想像中細好多，所以買最平果隻＄150 就得喇

仲有入面好熱好焗，星星熱到塊面紅哂要除衫

雜技團雖然冇動物睇，但有高空踩鋼線、電單車飛車，走球特技、空中飛人同宇宙巨輪

最搞笑係小丑 Chico Rico 好識搞氣氛，仲請埋星爸上台一齊表演 🥊boxing！

完 show 後會有姐姐賣扭波波，＄20 一個，星星揀咗個藍色，原來係隻狗仔爬上條長波波度

睇完表演去掉吓公仔，星星玩木桶超勁，一野掉中兩隻細公仔，好好彩！

仲要係 Minion 嘅獨角馬 😍媽咪最鐘意就係佢，多謝星星！

－

AIA 歐陸嘉年華

地址：中環龍和道 9 號中環海濱活動空間

開放日期：2017年 12 月 21 日至 2018 年 2 月 25 日

開放時間：11am - 11pm

WE嘩！恐龍遊樂園聖誕慈善嘉年華 - 青衣

2y5m

恐龍迷星星有福喇，今個聖誕節青衣體育會足球場會變身做恐龍遊樂園

恐龍樂園有七大歷險專區，包括二十五呎高充氣三滑道滑梯同埋二十呎高充氣彈床滑梯

係現場買套票要＄180（包四次＄50 遊戲同埋兩次＄20 小遊戲）

團購網 So Zmart 只需要＄148 一張套票、＄288 兩張套票、＄568 四張套票，好抵呀！👍🏻

星星一次過見到咁多恐龍好興奮，佢最鐘意最巨型果個「逃出速龍口」滑梯，可惜未夠高玩唔到

媽咪同星星去隔黎玩「長頸鹿樂園」，適合 90cm－140cm 嘅小朋友玩

排隊時要度高，星星應該有 94cm，好耶～～👏🏻夠高玩喇！

「長頸鹿樂園」嘅滑梯唔係太高，好岩星星呢啲 BB 級小朋友玩 😂

雖然媽咪係外面睇唔到星星係充氣床入面做緊咩，但有工作人員係入面睇住小朋友爬上去

有時星星唔夠力爬都會幫手扶吓佢，所以都唔太擔心

星星 sir 完一次又一次，總共可以玩六分鐘，有大概五至六個小朋友一齊玩

跟住挑戰難度高啲嘅「越押威龍」，有二十呎高，大大隻恐龍係正中間

其實都幾快幾高，但星星又好似一啲都唔驚，次次 sir 到落黎都笑得好開心

星星經過「森林越野車」好想玩，但要 95cm 先玩得，差少少先夠，搞到星星好失望 😢

唔緊要啦～食多啲飯食多啲菜出年再黎玩過啦！

媽咪帶佢玩其他攤位遊戲，有「懸浮射擊」、「地鼠鬥一番」同埋「木桶過三關」

「考古挖掘機」幾難控制，媽咪都搞唔掂，要靠姐姐幫手先挖到啲波波

最好玩係「恐龍騎士」，平時睇人騎馬睇得多，自己坐住隻識郁嘅恐龍都幾過癮

至於「恐龍生蛋」最中伏，星星淨係負責禁個制，接住隻恐龍蛋，有份小禮物，咁就完咗…

（唔怪之得冇人排隊啦…😨）好在星星都好 enjoy，接到隻蛋都笑得好燦爛

呢個嘉年華仲有「歷奇電船仔」同埋「波板糖賽艇」，全部都要 95cm 先玩得，星星得個望字

係小遊戲區隔黎有一檔賣飲品、爆谷同棉花糖，星星經過眼尾見到 🍿即刻指住要食

唔知點解星星呢排成日當咗 popcorn 係 KFC，搞到媽咪以為球場入面真係有得食 KFC 😂

－

WE嘩！恐龍遊樂園 聖誕慈善嘉年華

地址：青衣青綠街 38 號青衣體育會足球場

日期：2017 年 12 月 23 日至 2018 年 1 月 1 日

時間：11am - 6pm

反斗啤啤運動會 - 挪亞方舟

2y4m

我地係青衣鐵路巴士總站搭 NR330 巴士去珀麗灣，入咗馬灣後第一個站落車

挪亞方舟係聖誕節舉行「反斗啤啤運動會」🐻

有得親手整啤啤公仔，又有好多免費攤位玩，星星知道勁興奮！

去到挪亞方舟門口星星聽到有音樂以為去咗迪士尼 🤣

第一站去「啤啤熊製作室」，係 E 區搭 lift 落一層

星爸負責排隊，媽咪就同星星去搵斑馬影相

排咗大半個鐘終於到我地喇，有四隻色可以揀，星星揀咗淺啡色

有職員幫我地入棉花，星星負責補返好啤啤，又幫啤啤揀咗件籃球衫（聖誕衫賣哂…）

職員姐姐問星星要幫啤啤改咩名，星星話叫啤啤做打籃球 😂 

印咗「Dai Lam Kau」係啤啤張出世紙度，星星好鐘意隻啤啤，去到邊都攬住佢

星爸都整咗隻深啡色啤啤俾媽咪 😚

＄100 整啤啤，加＄120 可以揀衫俾啤啤，加＄20 可以噴香水，加＄100 有紀念相冊

－

反斗啤啤運動會

地址：馬灣珀欣路 33 號

日期：2017 年 12 月 9 日至 2018 年 1 月 1 日（逢星期六、日及公眾假期）

整完啤啤我地就去玩「冬日啤啤競技場」，總共有六個遊戲，全部都免費架！

玩完之後職員會係啤啤通行證上吸印仔，草滿五個印仔就可以係南翼二樓換長頸鹿吹氣公仔

有棒球、棍網球、躲避盤、柔力球、地壺球同健球

玩完去「方舟博覽館」參觀，星星最鐘意睇昆蟲同魚（星爸一開頭以為係假 😂）

我地又去睇 4D 立體影院，親歷大洪水嘅威力

本身想去埋方舟花園，但天氣太凍又開始天黑，唯有下次再去過啦！

行返去沙灘果邊搭 NR330 巴士去青衣，六分鐘一班車，太方便喇！

白雪天地｜隱藏光影國度 - D2 Place

2y4m

終於有時間帶星星黎 D2 Place 打卡影相喇

媽咪好想去睇隱藏光影國度同去白雪天地同星星影相好耐喇！

我地首先去咗二期地下睇深入地底嘅 The Undiscovered World

岩岩好唔洗排隊就開始播，平日下晝仲好少人添，媽咪同星星一齊坐地下靜靜欣賞

唔知星星睇唔睇得明，但佢一見到地球同宇宙就話「巴斯屋企」😂

－

隱藏光影國度 The Undiscovered World

地址：D2 Place 二期 The Garage 地下

開放日期：2017 年 11 月 23 日至 2018 年 1 月 1 日（逢星期二暫停開放，12 月 26 日除外）

開放時間：12pm - 9pm（每節十分鐘）

－

睇完投射表演去商場上面行個圈，見到 BABiBOO x 西班牙 Goula 有聖誕 workshop

＄30 可以 DIY 木製 postcard 仲會幫你寄埋添，星星都寄咗俾星爸，唔知聖誕前收唔收到呢 🎄

行過一個街口去 D2 Place One 嘅白雪天地影冰屋

搭𨋢上到頂樓再行多一層樓梯就到喇，好在今日去都唔係好多人～

星星最鐘意嘅 igloo，一見到即刻走上去擺 pose 影相，又係佢個 signature Iron Man pose 😂

星星仲係咁問媽咪啲雪係邊，好似見到啲假雪有少少失望

－

白雪天地 The White Planet 

地址：D2 Place 一期天台花園（乘搭升降機往十樓，沿樓梯直上）

開放日期：2017 年 12 月 2 日至 2018 年 1 月 1 日（逢星期二暫停開放，12 月 26 日除外）

開放時間：12pm - 9pm

－

影完相同星星行吓街，見到部珍寶珠夾糖機，俾＄5 佢玩吓啦（媽咪心諗邊有咁易夾到呀…）

點知星星真係勁好彩，一下禁到兩粒糖出黎，仲鬼咁開心，媽咪唯有破例俾佢食一粒啦！

嘉道理農場暨植物園 - 大埔

2y4m

諗住去嘉道理農場玩，順便去附近嘅 Forest Cafe 食啲野

一去到 Forest Cafe 已經見到有棵好大好高嘅樹係隔黎，好似入咗森林裡面

星爸最鐘意係佢地本 menu，handmade 皮面好舒服！

我地坐係出面，見到隔黎有個小賣檔，媽咪帶星星去睇吓

有得俾小朋友 DIY 玻璃瓶，就同星星去玩吓，星星揀咗星星樽，又自己擺烏龜同鴨仔入去

＄30 好靚呀！而且老闆娘超有心機，逐個 step 教星星點樣擺點樣揀顏色先靚

整完我地啲野食都 ready 喇，時間岩岩好

我地嗌咗燒鳥、魚手指拼薯角同 Angus Beef Salad，牛排麻麻地，不過魚手指同燒雞好好味 😋

星期六好多人都會帶埋狗狗黎，星星 hello 隔黎隻狗狗，聽到佢地吠仲 shu 人地 😂

－

森林咖啡 Forest Cafe

地址：大埔林錦公路DD19段

營業時間：1pm - 6pm（星期一休息）

食飽就出發去嘉道理農場，渣車嘅話五分鐘就到

我地好晏 3:45pm 先去到，去到先知好多館 4:30pm 就收，所以要急急腳係咁行

都睇到野豬、赤麂、紅鶴，又去睇花花

星星最鐘意睇猴子，見到佢地跑黎跑去好開心，其中有隻猴子好百厭，仲識拍窗嚇返人轉頭

玩到五點都差唔多要走喇，望住夕陽一路行，星星攰到行唔郁要星爸抱

今次黎嘉道理太趕喇，下次要早啲出門口，星爸話都係去行山好玩好多～

－

嘉道理農場暨植物園

地址：新界大埔林錦公路

營業時間：9:30am - 5pm

綠田園燒烤樂園 - 天水圍

2y4m

上網見到綠田園有水上單車好吸引，媽咪最鐘意做浪漫野，一定要帶最心愛嘅人黎呢度！

（原來仲好近屋企…住咁耐都唔知有呢個地方 😅）

媽咪臨出門口時係咁同星星講陣間去水上面踩單車，一去到就即刻衝去個湖度

比想像中大，真係唔知原來天水圍都有湖架，一路踩仲可以一路餵魚添

星星自己坐一邊，媽咪一開頭都好驚佢會紥紥跳跌落水，係咁洗佢腦要坐定定

平日冇乜人，成個湖得我地兩個，個天陰陰地，帶少少涼風

同星星一路靜靜地傾吓計，一路踩水上單車，再一路餵魚（太浪漫…😍）

星星餵餵吓成包魚糧倒落水，勁多魚一齊湧上黎，佢睇到好開心

踩咗二十分鐘就玩完，我地都四周圍行吓，見到有隻大恐龍星星爬埋上去

行行吓見到有得玩手動艇，星星自己一個坐都好鎮定，反而媽咪係水池出面驚佢會反艇 🙈

不過星星唔夠大力又唔係好識控制隻艇，搞到不停轉圈

老闆好好人，幫我地換隻大啲嘅艇， 等媽咪可以同星星一齊玩，仲話玩幾耐都冇問題添！

之後我地去動物農莊睇龜同羊咩咩，冇職員係附近，買唔到紅蘿蔔餵佢地

星星自從係大棠見到有角嘅羊好曳周圍推其他冇角嘅羊之後，就認定全部有角嘅羊都曳曳

所以佢係咁指住啲羊嗌佢地做曳曳 😂

綠田園仲有好多野玩，兒童車、跳彈床、滾球、撈金魚（平日冇開）而且仲整緊個滑草場添！

老闆話遲啲聖誕會有 package，應該會再多啲野玩，可以嗌埋星爸一齊去喇！

－

綠田園燒烤樂園

地址：天水圍沙江圍側（由天華路進入）

開放時間：10am - 6pm