Last visit on 2017.11.17
上次黎朗屏士多啤梨葡萄園係摘提子，今次輪到摘士多啤梨喇，仲同埋星爸一齊去添！
朗屏士多啤梨葡萄園種咗五款日本士多啤梨（上次媽咪係大阪食過真係好甜好多汁）
分別有靜岡縣章姬、佐賀穗之香、熊本縣紅臉頰、奈良縣紅寶石同福岡縣博多甘王
聽聞佐賀穗之香嘅士多啤梨係最甜，於是我地就先摘呢款試吓甜唔甜
星星好雀躍拎住個籃周圍搵又大又紅嘅 🍓自己摘完再擺入個籃度
但去到發現已經得返好少士多啤梨，好多都未熟嘅同爛爛地
揀咗十幾粒就去磅重俾錢，五款士多啤梨都係＄80 一磅
我地摘咗果啲唔算好甜，有啲仲好酸添 😖
星星不嬲都好鐘意食酸嘅水果，佢不停食不停話好味，好快就清哂
星爸話再摘過第二款睇吓有冇啲滄海遺珠，星星知道有得再摘 🍓好開心
經過一棵大樹幫星星影吓相，自己識擺 pose 仲笑得好鬼馬 😜
今次我地摘熊本縣紅臉頰，睇落去比佐賀穗之香大粒好多，同埋都多靚嘅士多啤梨
唔經唔覺已經摘咗半個籃，又有少少肚餓
我地去返小賣部俾錢，順便買條烚栗米同砵仔糕（最衰烚蕃薯岩岩賣哂…）
星星好鐘意食栗米，好清甜又暖笠笠，自己密密食食咗半條
不過啲士多啤梨就…仲酸過上次果隻，好似得幾粒係甜少少，好在星星都有幫手清咁啲
臨走時見到葡萄藤係鐵欄上面，有個紙袋包住啲提子，唔知幾時有得食呢 😋
－
朗屏士多啤梨葡萄園
地址：元朗大棠路大棠村球埸（大棠村牌坊右轉）
營業時間：8am - 6pm
No comments:
Post a Comment