2y4m
秋天要帶星星多啲去農莊，接觸吓大自然
我地今日去錦田鄉村俱樂部，呢度佔地 100 萬平方呎，免入場費仲免費泊車
有兩個超大型草地、有蓋燒烤場、小羊天地、兔子樂園、塘蚤池、射箭場等等
星期六日仲會有好多小朋友 DIY 工作坊、撈金魚、跳彈床、放風箏、租單車
平日會少啲野玩，但人少少，同星星係度舒舒服服 hea 半日都唔錯丫！
俱樂部入口有個大草地，星星已經急不及待開 turbo 跑喇
媽咪去小賣部買咗幾棟菜同魚糧準備陣間餵兔仔同魚
期間不斷有好多架直升機飛過，星星指住話「Helicopter 飛好高呀！」又同佢地揮手 😂
我地經過蕃薯田去搵兔仔，本身啲兔仔瞓緊覺
星星一行埋去大叫「Wake up」兔仔見到有野食即刻衝過去
可能係平日，得四隻兔仔係個籠度，星星餵完呢隻又餵果隻，自己餵完都開心到拍手
餵完兔仔隔黎有個洗手盆可以洗手，太方便喇！
經過兒童遊樂場，我地去到魚池喇，星星最鐘意就係餵魚
一開頭都係遂粒遂粒咁餵，餵多陣就成包倒哂落去，啲魚同龜蜂擁而上
玩咗陣星星都有啲攰同開始出汗，我地就坐低休息吓
星星第一次食紅豆雪條，好仔細咁研究個包裝袋，又話好凍但又不斷食 😅
休息咗陣就開始嗌攰，呢隻慢叉王真係成日都要瞓覺
諗住走果陣途經兒童樂場，星星見到電動車好想玩，咁岩有個職員行過黎
見星星咁想玩，就俾佢揀車，星星雙眼發光揀咗架紫色車
媽咪同星星一齊坐，兜咗兩個圈，星星好開心，仲話好快（其實好慢…可能媽咪太重）
玩完星星都好乖幫媽咪搬返去原位，仲話返到屋企要話俾星爸聽佢今日有渣車
媽咪覺得錦田鄉村俱樂部好玩過大棠茘枝山莊，地方乾淨啲之餘仲免入場費，而且職員都好 nice
等遲啲十二月就可以同星星黎多次摘士多啤梨添呀！
－
錦田鄉村俱樂部
地址：錦田水尾村 230 號（ 601 綠色小巴直達門口）
2y4m
星星第一次學校旅行，我地自己渣車去，朝早去到勁勁勁凍 🌬🌬真係食西北風
有心機佔地二十五萬平方尺，有最大型嘅温室，供應一等有機蔬果
而且仲會出售俾國際知名嘅香港酒店，所以品質一定有保證！
第一個行程係去整 pizza，係薄餅皮上面揸蕃茄醬，再擺洋蔥、三色椒、菠蘿、辣肉腸同芝士
媽咪勁鐘意食 🧀仲擺咗好多落去，整好就拎俾職員幫我地烤
佢地唔係用普通焗爐，係佢地自己 DIY 嘅意大利 Tuscany style 烤爐，再用埋荔枝木生火
Pizza 擺入烤爐五分鐘就食得，一拎出黎見到啲芝士已經溶哂，側邊仲燒到脆卜卜， 睇落好好味
第一次親手整嘅 pizza 特別好味，啖啖芝士，星星仲食到停唔到口
第二個行程去拔紅蘿蔔，原來蘿蔔仲細過啲蘿蔔葉 😂
我地洗乾淨之後，可以留住蘿蔔陣間去餵兔仔，星星一知道有得餵兔仔，係咁催媽咪快啲搵佢地
第三個行程去餵兔仔，星星伸條草入個籠度，兔仔搶住食，仲識揀紅蘿蔔食多過食葉
兔仔隔黎有隻大肥豬，真係好肥呀，星星指住話係 Peppa Pig 🐷
職員話呢隻豬唔食得架，係寵物豬養到咁大隻，好食好住！
第四個行程去種花，先舖泥土係底，擺肥料，再擺一棵草苗，最後再用泥土填滿花盆
星星由細到大都有潔癖，一路整一路嫌污糟仲一路皺哂眉，係咁 e 擺少少泥就當做完
跟住我地又去用乾花整鎖匙扣，星星開始嗌攰要媽咪抱，媽咪抱咗一陣星星就瞓著咗
真係全校最早瞓著 💤仲點篤佢塊面都唔醒，瞓到勁 lum
媽咪問老師我地仲有咩行程啦，老師話玩多個零鐘都完喇，咁我地唯有早走
星星不嬲都好瞓得，每日都要瞓好耐先夠，但估唔到佢係咁嘈嘅環境都瞓得著
可能佢今日真係玩得太盡興 😅第一次學校旅行真係好難忘！
－
Zen Organic Farm 有心機
地址：粉嶺打鼓嶺李屋新村丈量約份第 87 約
開放時間：星期二至日 10am - 5:30pm
2y4m
香港文化博物館今年再度同 Pixar 合作，以友情同親情作為主題
製作《彼思動畫30年：家＋友‧加油！》嘅展覽，場內分為十一個展區
以 Pixar 經典動畫作為主題，展出多張手繪素描稿、油畫、分鏡圖、初稿同樹脂模型
有 Toy Story、Monsters University、Inside Out、Up、Cars、Wall E、The Incredibles 等等
星星不嬲好鐘意睇 Pixar 嘅戲同書，其中佢最鐘意嘅係 Toy Story，第一至三集都睇到滾瓜爛熟
媽咪一話同佢睇巴斯就已經好雀躍，仲以為有得去 Disney 添 🤣
我地去到門口就見到 Inside Out 嘅角式，星星最鐘意係呀燥同呀愁，次次見到呀愁都會呵返佢
入到博物館買飛，星星未夠四歲免費入場，大人票要二十蚊
買飛入場仲會送場刊同 Pixar memo 紙，媽咪好鐘意呀！
電梯門口有 The Incredibles 一家，星星曾經連續睇呢本書幾十次，所以都好熟悉啲角色
上到一樓就去睇 Pixar 展覽，門口有個 video 不停播返 Pixar 嘅經典動畫，星星睇到入哂神
展覽廳會根據唔同動畫畫分成不同展區，星星對啲畫冇乜興趣，反而係媽咪鐘意睇多啲
每個展區中間都擺咗經典角色嘅立體雕塑
睇完展覽仲可以出去同怪獸公司同麥坤影相添！
星星好鐘意麥坤，即刻叫媽咪幫佢影相，仲識擺返佢個招牌 pose 🤩
睇完一樓去返地下搵巴斯影相，經過 Pop-Up Store，賣會場限定嘅 Pixar 產品，出面無得賣
最特別係可以 DIY 衛衣、手機殻、尿袋同咕𠱸，可以自己揀顏色、圖案，什至加名都可以
星星入到去俾啲玩具吸引住，樣樣都想買，媽咪話淨係可以揀一樣，佢最後揀咗巴斯遙控車
離開 Pop-Up Store 去到兒童探知館門口，就見到巴斯同三眼仔喇
星星仲話要送岩岩新買果架遙控車俾巴斯，將心愛嘅野送俾心愛嘅人 🤣
星星同三眼仔影相又擺佢個招牌 pose，後面排緊隊嘅姐姐都話佢好搞笑，識自動擺 pose
今次星星睇得玩得買得好開心，個展覽去到出年三月先完，媽咪遲啲一定要再帶星星去多次！
－
Pixar 動畫30年：家＋友‧加油！
地址：沙田文林路一號 一樓專題展覽館及地下香江童玩展廳
展覽日期：2017 年 11 月 18 日至 2018 年 3 月 5 日
2y4m
UPDATE: AM Offer
好幸運地星星有 Victoria second interview 嘅機會
上個星期收到 email 都好意外，睇完一次又一次 make sure 媽咪冇睇錯
上網揀好 interview 日子時間，再填埋問卷 send 俾學校，再係屋企 prepare 點答啲問題
今次星爸都同媽咪一齊去，唔洗帶星星去 interview 令我地都擔心少樣野
10:00am interview，我地早咗少少去到，坐係校長室門口等
見到對上一位家長入咗去八分鐘就出返黎，心諗應該都係 casual talk
入到校長室見到陳校長，首先校長叫我地簡單介紹吓星星，又問我地點解會揀 Victoria
校長都有再講吓 Victoria 嘅教學模式同家校合作嘅方式
成個 interview 嘅感覺都好 smooth，校長又好 nice，好希望星星可以係呢間學校讀書
我地 in 咗十幾分鐘，出到黎一身鬆，仲同星爸食咗個早餐就去接星星放學
希望見家長呢 part 冇辜負到星星嘅努力啦～～～
2y3m
終於等到星爸得閒少少可以一家人去玩，今日決定去愉景灣同星星影多啲相
我地渣車去到欣澳港鐵站，再轉 DB03R 巴士去愉景廣場 D'Deck
星星全程都瞓到隻豬咁，一落巴士就瞓醒，叉足電去玩
我地去 Zak's 依肚先，揀咗個可以望到海嘅位，可以望到沙灘，好舒服呀
星爸又再次嗌到成枱都係野食 😋星星食兒童餐 Chicken Fingers
我地嗌咗椒鹽魷魚、Clam Chowder、Beef Burger、Chefs Fish of the Day
啲野食黎到先知原來好大份架，不過樣樣都好好味
媽咪最鐘意食星星個炸雞，好 juicy 好滑，另外 Clam Chowder 好足料，配埋法包好好味
食飽飽就出發去影相喇，係愉景廣場一路行路影
星星見到大空地就跑，有梯級就跳，仲玩到好開心
途經愉景灣沙灘，星星見到超想去玩沙，於是就順吓佢意啦
涼涼地嘅天氣沙灘都冇乜人，星星周圍跑仲追住星爸掉沙
好快佢成頭成身成褲都係沙，冇 expect 過會去沙灘玩所以都冇帶多套衫俾星星
係沙灘玩咗大半個鐘，天都就黎黑，我地就返屋企喇
其實今日仲想去埋海濱白教堂影相，點知唔夠時間，希望下次有機會再黎啦！
2y3m
又到冬天，香港有好多地方可以摘士多啤梨，但摘提子就真係第一次聽
朗屏嘅葡萄園有巨峰同香印，仲要係日本黎嘅品種
今日媽咪就同星星去摘提子喇～～
我地渣車去，仲唔小心兜咗入條私家路，其實係球埸行入去都好近
農莊嘅入口全部都係葡萄藤，昂高頭仲會發現有提子添
入到去個農莊其實都幾大，我地都急不及待去摘提子喇！
園主每人派一個籃同一把鉸剪，仲教我地要摘啲大粒嘅，如果唔係就未熟會好酸
星星都自己拎住個籃出發搵提子，佢唔夠高所以搵極都係啲未熟嘅提子
香印提子冇想像中咁大粒，普通 size，反而巨峰睇落大粒啲，感覺應該會好味啲
摘咗半個鐘我地個籃都開始 full，可以去俾錢食喇
巨峰一磅＄80，香印一磅＄130，我地 total 摘咗＄340，其實都唔平 😅
媽咪洗乾淨之後就同星星開餐，香印啲皮好厚，要搣皮先甜
可能我地唔識揀，有啲好酸，酸到好似食緊檸檬咁
巨峰就好味好多，早知我地摘多啲啦，連星星都話紫色提子好味啲
農莊入面仲有大草地，遲啲可以約埋朋友一齊去野餐！
－
朗屏士多啤梨葡萄園
地址：元朗大棠路大棠村球埸（大棠村牌坊右轉）
營業時間：8am - 6pm
2y3m
星星第八個 K1 interview，10:30am interview
今日星星有啲唔舒服，食咗藥個人呆吓呆吓，希望冇影響佢表現啦
入到去家長著鞋套，係室內 playground 度玩咗陣，聽到嗌名就入課室
有六個小朋友分別係唔同枱度玩玩具，其間會有老師行埋黎同佢地傾計
第一位老師係外國人，佢同星星傾計，星星唔 show 佢 😓
咁老師問媽咪平時係屋企同星星用咩語言溝通
之後到第二位普通話老師，星星又唔出聲
到第三位廣東話老師，星星都係繼續唔出聲
但老師叫星星俾唔同顏色嘅啤啤老師，星星都有照做
又叫星星俾兩隻、三隻馬騮老師，星星又俾岩哂
過多陣老師忍唔住問媽咪星星平時係屋企係咪都唔講野 😓媽咪唯有話星星食咗藥唔係咁舒服
之後就圍圈聽英文老師講故事，係星星聽過好多次嘅「Dear Zoo」
老師會叫小朋友打開掀吓入面係咩動物，個個小朋友都好合作
之後同普通話老師唱歌，叫小朋友互相握手，唱完就送咗隻手指玩具
星星都已經攰到冇哂電，唔緊要啦，媽咪知你辛苦盡咗力喇 💋
2y3m
UPDATE: WAITING LIST
星星第七個 K1 interview
1:50pm interview，呢個鐘數不嬲都係星星瞓緊晏覺嘅時間
唯有今日同星星請假，朝早同佢去公園狂放電
10:30am 瞓覺，12:30pm 起身，岩岩好瞓醒就出發喇
學校好準時 1:50pm 就俾人入去，我地去到 playground 度玩咗陣
聽到叫名就入課室 group in，六個小朋友一組，小朋友坐前面，家長坐後面
可能入面有五位老師，星星有啲緊張同扭計，一定要痴住媽咪 😨
唱完 hello song 個個小朋友都冇乜反應，然後老師嗌名遂個擺生果落動物個籃度
星星最後一個出去，老師叫星星擺士多啤梨落狗狗個籃度 (ENG)
其實好簡單…但星星就係都唔肯出去，老師行埋黎拎埋個籃俾佢都唔肯伸手拎士多啤梨 😨
媽咪都已經滴哂汗，唯有頂硬上，一路鼓勵星星一路拖住佢隻手一齊行出去
星星擺岩咗就自己坐返埋位，然後就轉課室一對一 interview
課室有四張枱，每張枱有一位老師，我地揀咗英文，所以老師都全程同星星講英文
老師首先問星星叫咩名，然後叫星星同老師 high five
跟住俾咗張圖星星，有爸爸同一個小朋友，老師叫星星指邊個係小朋友
又問 orange 係邊，orange 隔黎果個係咩水果，banana 係咩色，都係圍繞住生果嘅問題
之後老師叫媽咪同星星一齊睇書，係一本關於動物嘅認知書，其實冇故事內容嘅書好難講
睇完就可以去課室側邊嘅枱度睇書等
最後去一間課室，家長填問卷，小朋友睇書
問卷有兩條問題「建議家教會可以有咩活動」「期望小朋友係父母身上學到咩」
星星頭十分鐘都有坐定定睇書，到尾果五分鐘見到有幾個小朋友開始離開位行黎行去
星星都有啲心郁想走，媽咪係咁鼓勵佢，仲有最後幾分鐘咋，見埋老師就食得波板糖
聽到主任叫星星名，星星幫媽咪拎問卷俾主任
主任問星星頭先食咗咩，星星話「紅蘿蔔…西瓜…粉粉」😨 (頭先明明食魚柳 bell )
跟住問邊個煮架？星星答媽咪，老師又問媽咪有冇食呀？星星話冇
咁老師話你快啲返屋企同媽咪去食飯喇，然後送咗個 folder 俾星星就走得喇
LH interview 安排得好好，學校唔會有好多人，一間課室接一間課室，唔洗等好耐
不過今日星星表現麻麻，真係同呢間學校冇緣喇
一上車星星就嗌食波板糖，知你辛苦喇，今日都好叻叻肯開口講野 👍🏻
2y3m
UPDATE: AM Offer
星星第六個 K1 interview
3:15pm interview，班房門口有個 outdoor playground 俾星星熱吓身先
搭正三點三入班房，有幾個外藉老師 in 九個小朋友
小朋友係班房 free play 玩玩具，媽咪帶星星去其中一枱有好多小動物嘅 figure
星星將同顏色嘅動物擺返入個杯度，好專心係度玩
老師就黎問星星叫咩名啦，星星冇出聲 😅
咁老師就轉問媽咪星星「有冇返緊幼稚園呀？」「介咗片未呀？」
「係屋企講咩語言呀？」「平日多數去邊度玩呀？」(ENG)
其實都係好 informal chat，但係媽咪實在太耐冇講英文喇，講得好甩 cut 😔
星星雖然唔係好 show 老師，但都有同佢交流，老師叫佢 shake 吓 coconut 都有照做
最後有老師送貼紙俾星星，星星揀咗黃色甲蟲，無啦啦講「ladybird」
俾老師聽到，老師話「It's a yellow ladybird」，星星又繼續唔 show 人 😅
希望媽咪啲英文冇累到星星啦，我知你今日表現好好，比平時冇咁怯場，好快融入到
係香港有一條龍嘅 IB 學校唔多，係新界嘅更加少之又少
好想你讀到一條龍嘅學校，將來唔洗咁大壓力呀
2y3m
UPDATE: WAITING LIST
星星第五個 K1 interview
12:00pm interview，俾星星瞓咗一個鐘叉電，又要去 in 第二間喇
入到學校有好多攤位玩，好熱鬧
媽咪見唔對路都係拖住星星快啲入去交 form，如果唔係星星實賴死唔肯走！
係 indoor playground 玩咗一陣就叫星星，課室有兩張枱，每張枱有一個老師
媽咪拖住星星入去，星星自己拉凳坐
老師問星星叫咩名、幾多歲、邊個同佢黎、頭先食咗啲咩呀？
又俾咗個四格玩具星星，叫佢禁啲制彈返啲動物出黎，都好簡單
然後有四張圖問星星係咩黎，有手、杯、蘋果同香蕉
星星答岩哂，老師又問佢鐘意食蘋果定香蕉，星星就拎住香蕉張圖
跟住老師拎個布公仔，問星星佢嘅眼耳口鼻係邊
又拎咗兩個碗，有三粒積木，叫星星由 A 碗擺去 B 碗，再疊高
最後老師推架車車俾星星，叫星星推返俾佢，送咗樣玩具俾星星就走得
啲問題都好簡單，星星都做到哂，不過 K1 只係收好少學生，所以都冇抱好大期望
星星今日都做得好好呀，冇怯場又肯講野
今個星期嘅 interview 告一段落，下個星期又有四間，媽咪知你辛苦喇，加油呀 💪🏻
2y3m
UPDATE: AM Offer
星星第四個 K1 interview
8:45am interview，排咗一陣就入得學校喇
去一間課室度交 form ，之後再轉另一間課室就直接 interview
有兩位老師，一個 in 家長，一個 in 星星
一坐低，老師 A 問星星叫咩名、幾多歲，星星都有答
同一時間老師 B 就問媽咪問題
「你住得都幾遠喎，點樣返學呀？」「平日邊個湊星星？」「放假去邊玩？」
「介咗片未呀？」「點解揀呢間學校？」「小朋友係街鬧情緒，點處理？」
都係問啲好大路嘅問題，媽咪眼尾望到星星玩緊手抓板
同隱約聽到老師 A 叫星星指吓自己個頭，又叫星星舉高隻手
到星星 in 完媽咪仲答緊問題，要星星同老師係度等 😆
最後要係老師面前唱歌，最難嘅環節所以媽咪都預咗星星會冇咩反應
in 完後就出去交 form 俾老師，老師俾咗粒瑞士糖星星
成個過程好快，出到黎都係 9:05am 咋
但根德園老師俾我嘅感覺好 cool 同冇乜笑容，搞到媽咪答問題時都有啲緊張
同星星去食媽咪最鐘意嘅麥記獎勵吓，食完就拿拿臨瞓覺趕去下一場
2y3m
星星第三個 K1 interview，挑戰吓對面海嘅幼稚園
雖然冇諗過會讀，但當俾星星玩吓練習吓啦
9:00am interview，早到咗少少，係車度等咗陣
入到學校排隊交通知信，就可以坐低一路睇學校嘅 video 一路等
等咗十五分鐘就上樓上 interview
六個小朋友一組坐地下，家長坐後面
星星初頭有少少怕陌生環境，要拖住媽咪，媽咪係咁鼓勵佢，又話陣間可以玩玩具
咁星星都好似放鬆咗，可以自己坐好
老師叫小朋友遂個拎布波波，摸吓佢又 shake 吓，聽吓有冇聲
又叫小朋友傳個波波俾媽咪，跟住就擺返入籃，星星都做得好好，好聽話
之後就自由係後面玩玩具，有一個老師睇住星星又同佢講野
老師叫星星穿珠仔，星星穿哂，但就掛住玩唔多願意開口講野 😓好在最後都有同老師講 byebye
跟住去第二間房見副校同主任，十二個小朋友坐凳仔圍圈，家長又係坐後面
有個老師係前面講故事唱歌，咁副校同主任就 mark 小朋友有冇反應啦
星星都係呆坐，唔願郁（其實媽咪都預咗...😂）
聽完故事輪流同老師講 byebye 就走得喇
今次都好快 in 完，出到黎都係 9:45am
呢次 interview 對於星星黎講好難，因為星星唔鐘意係好多人面前做動作同跳舞
所以一有唱遊環節媽咪就好擔心，但十隻手指總有長短，媽咪都覺得星星做得好好呀
起碼肯自己坐好，又有 say goodbye，盡咗力就 ok 喇，希望下次再做好啲啦，努力呀 💪🏻
2y3m
UPDATE: WAITING LIST
星星第二個 K1 interview
黎之前不斷洗佢腦如果乖乖答老師問題就有得食波板糖，波板糖留係車車度等星星出黎
9:15am interview，我地 8:45 am 就到咗喇，學校門口又係已經排哂長龍
排咗十五分鐘就入學校，又繼續排隊交 interview slip，交完坐低等咗陣就入課室
課室有四張枱，五個小朋友一組，枱面有好多 LEGO
有老師企係側邊 mark 分，睇吓小朋友有冇砌
星星坐係媽媽斜對面，有一米嘅距離，佢冇扭計，好主動疊高高，好快就砌到勁高
砌完一條又一條，我問佢「你砌緊咩呀？」星星話「bang bang 槍」😂
仲好開心咁拎住枝槍 bang 媽咪，砌砌吓見到隔黎小朋友冇郁過，又幫人砌吓
玩咗十分鐘到就要 tidy up 轉第二個課室
呢間課室有三張枱，每張枱有一位老師一對一 interview
我地又等咗十五分鐘到，等到星星都坐得有啲唔耐煩，開始郁黎郁去
終於等到嗌名喇，星星自己拉凳坐好，媽咪坐側邊填問卷
問卷有四條「小朋友係學校最重要學啲咩？」「點為止好嘅家校合作？」
「小朋友鬧情緒你點處理？」仲有一條填唔切都唔係好記得問咩 😓
星星就係側邊同老師 interview，聽到老師問星星叫咩名、幾多歲，星星都有答
然後又拎個袋出黎叫星星伸手入去摸，估吓係咩黎，聽到星星話「車車」
跟住有穿珠仔、砌飛機 puzzle、餵小朋友食野同叫星星係後面個 tray 拎某種玩具
最難係有兩張 A4 紙，每張紙分咗六個格
其中一張六格都有唔同嘅生果，另一張紙就得兩格有生果
老師叫星星係啲空格上面擺返對應嘅生果，但星星擺極都擺係有生果嘅果張紙度
大概十分鐘到就 in 完，老師俾餅餅，星星都有 say thankyou 同講 bye bye
最後走果陣係媽咪提小小水嘅情況下都記得要推凳，出返門口已經差唔多十點
今次星星表現得好好呀，因為媽咪 expect 星星咁慢熱應該唔會開口講野
但隱約都聽到佢同老師講「車車」「綠色」「啤啤」（不過唔知答得岩唔岩…）
媽咪完全收貨而且好欣賞星星，起碼佢肯沖破自己開口講野，太好喇！
媽咪都兌現承諾，一上車就俾珍寶珠星星，仲讚佢今日做得好好
星星今日都好攰，用咗好多 energy 去做唔同 task，未返到屋企十點半就訓咗喇 😦
PS. 學校門口長期有人抄牌，停係度等人都照趕，千奇唔好泊係果度
